D.Nazarbaeva: Jastar bilim úshin emes, dıplom úshin oqýǵa barady
ASTANA. QazAqparat - Jastar kolledjder men joǵary oqý oryndaryna bilim alý úshin emes, dıplom alý úshin barady. Búgin QR Parlamenti Májilisindegi «Tehnıkalyq jáne kásiptik, joǵary bilim berý júıesinde ekonomıka salalary úshin kadrlar daıarlaýdyń sapasy men perspektıvalary týraly» parlamenttik tyńdaý barysynda QR Parlamenti Májilisi Tóraǵasynyń orynbasary Darıǵa Nazarbaeva osylaı dedi.
«Jemqorlyq bilim berýdiń barlyq salasyndaǵy júıeli problemaǵa aınalǵanyn moıyndaýymyz kerek. Sonyń saldarynan bilim alýshylardyń yntasy tómen. Olar kýrstyq jumys jazýǵa ýaqytyn ketirgenshe, aqsha tóleı salǵandy jón sanaıdy. Jastardyń bir bóligi kolledjder men joǵary oqý oryndaryna bilim alý úshin emes, dıplom alý úshin barady», - dedi D.Nazarbaeva.
Sonymen qatar onyń atap ótýinshe, bilim berý salasyn jappaı kommertsııalandyrý saldarynan kóptegen memlekettik jáne memlekettik emes bilim berý mekemeleri bilim berý salasyna tabys tabý kózi retinde qaraıtyn boldy.
«Olar kommertsııalyq alymdardan túsetin qas-qaǵymdyq aqsha túsimderimen ómir súrýde, bilim berý sapasyna qamqorlyq jasamaıdy. Al ǵylymı zertteýler jaıynda sóz qozǵaýdyń ózi artyq. Qoǵam reformadan qajetti tıimdilik kórip otyrǵan joq», - dedi Májilis Tóraǵasynyń orynbasary.
