D. Nazarbaeva jastar arasyndaǵy sýıtsıdtiń órshýine alańdaýshylyq bildirdi
ASTANA. 7 qarasha. QazAqparat - Búgin Parlament Májilisiniń jalpy otyrysynda depýtat Darıǵa Nazarbaeva elimizde jastar arasyndaǵy óz-ózine qol jumsaý faktileriniń kúrt ósip otyrǵandyǵyna alańdap, Bilim jáne ǵylym mınıstriniń atyna saýal joldady.
Depýtattyń aıtýynsha, sońǵy onjyldyqta Qazaqstanda jastar arasyndaǵy óz-ózine qol jumsaý kórsetkishi shamamen 3 esege artqan. Jyl saıyn 15 pen 19 jas aralyǵyndaǵy árbir 12-shi jasóspirim ózine qol jumsaýǵa umtylys jasaıtyn kórinedi.
«Dál osy jastaǵylar toby boıynsha sýıtsıd kórsetkishterimen Qazaqstan TMD elderiniń arasynda birinshi orynǵa shyǵyp otyr. 2011 jyldyń qorytyndysyna sáıkes, Qazaqstan elder arasyndaǵy ózin-ózi óltirý faktileri boıynsha joǵary jáne asa joǵary deńgeıdiń birinshi tobyna endi jáne 100 myń adamǵa shaqqanda 30 sýıtsıdten kelip, Lıtva, Soltústik Koreıa elderinen keıingi úshtikte tur. Budan bólek, 2011 jyly Qazaqstanda sýıtsıdtiń 257 oqıǵasy men 592 áreketi tirkelipti. Al sarapshylar bundaı teris qubylystyń eń kóp taraǵan sebebine emotsıonaldy jáne fızıkalyq kúsh kórsetýlerdi, ata-ana iltıpatsyzdyǵyn, qurdastary tarapynan qoqan-loqqylyqty, otbasyndaǵy qarjylyq jaǵdaıdy alǵa tartady», - deıdi depýtat.
Bul rette D. Nazarbaeva bilim salasynda Ulttyq biryńǵaı testileý júıesi engizilgennen keıin de Qazaqstanda sýıtsıd sanynyń artqanyn alǵa tartty. Eger máselen, 2009 jyly qazaqstandyq oqýshylar arasynda álgindeı 209 oqıǵa tirkelse, 2010 jyly bul 237-ge jetti. Osy máselelerdi alǵa tarta otyryp, depýtat mınıstrden birneshe suraqtarǵa jaýap berýin suraıdy.
«Atap aıtqanda, sýıtsıdti boldyrmaý úshin UBT ótkizý úderisin jetildirý boıynsha qandaı sharalar qabyldanýda? Oqýshylar arasynda óz-ózine qol jumsaý deńgeıin tómendetý jóninde júıeli sıpatta qandaı sharalar atqarylmaq? Jasóspimirder sýıtsıdiniń óńirlik aspektileri qalaı eskeriledi?», - dedi D. Nazarbaeva.
