D.Nazarbaeva: Ustazdardyń úsh tildi bilim berýge daıyndyq deńgeıi 2018 jyly baǵalanady
ASTANA. QazAqparat - Ustazdardyń úsh tildi bilim berýge daıyndyq deńgeıi 2018 jyly baǵalanady. Bul týraly búgin Qazaqstan bilim salasy qyzmetkerleriniń respýblıkalyq tamyz keńesinde sóz sóılegen QR Premer-Mınıstriniń orynbasary Darıǵa Nazarbaeva málim etti.
Ol óz sózinde úsh tildi bilim berý júıesin engizýge 2 jyldan astam ýaqyt bar ekendigin jáne Úkimet tarabynan barlyq jaǵdaı jasalatyndyǵyn basa aıtty.
«Biz ustazdardy qajetti bilimmen daıarlaıtyn bolamyz. Qazirdiń ózinde muǵalimder belsendilik tanytyp jatyr. 5 myńnan astam ustaz ózderiniń erkimen 4-9 aılyq tildik kýrstarǵa jazylǵan. Bul kezde olardyń jumys orny men eńbekaqysy saqtalady»,- dedi ol.
Onyń atap ótýinshe, elimizdiń joǵary oqý oryndarda aǵylshyn tilindegi oqý baǵdarlamalary belsendi engizilý ústinde.
«Ustazdardyń daıyndyq deńgeıin biz 2018 jyly baǵalaımyz jáne saraptama nátıjesin Elbasyna baıandaımyz. Sondyqtan dúrbeleń jasaýǵa eshqandaı negiz joq. Qazaq tiline eshteńe kedergi keltirmeıdi. Kerisinshe, orys tildi mektepterde memlekettik tildi oqytýdy kúsheıtý josparlanyp otyr. Qosymsha eki pán qazaq ádebıeti men qazaq tarıxy qazaq tilinde oqytylatyn bolady. Búginde Bilim jáne ǵylym mınıstrligi tildi oqytýdyń jeńildetilgen zamanaýı ádisin ázirlep jatyr», - dep atap ótti D.Nazarbaeva.
