D. Nazarbaeva: Úkimettiń jylyna tórt márte dári-dármek satyp alý erejelerin ózgertýi sybaılas jemqorlyqqa jol ashyp otyr

ASTANA. QazAqparat - «SK-Farmatsııa» dári dármekpen úzdiksiz qamtamasyz etý problemasyn sheshe almaı otyr. Bul týraly búgin Parlament Májilisindegi Úkimet saǵatynda depýtat Darıǵa Nazarbaeva osylaı málimdedi. Jıynda «Salamatty Qazaqstan» baǵdarlamasynyń oryndalý barysy talqylanǵan bolatyn.

«Dári-dármekpen qamtamasyz etý salasynda biryńǵaı dıstrıbıýter júıesin engizý áli kúnge sheshimin tapqan joq, onyń ústine «SK Farmatsııa» bizdiń emhanalarymyzdy úzdiksiz dári-dármekpen qamtamasyz etý máselesin sheshe almaıdy. Budan bólek, «SK Farmatsııa» qazaqstandyq prepatattardy satyp alýdy úsh mlrd. teńgege azaıtty jáne otandyq óndirýshilerdiń basyn sot protsesterimen qatyryp júr. Úkimet jylyna tórt márte dári-dármek satyp alý erejelerin ózgertedi. Bul da sybaılas jemqorlyq pen qazyna qarjysyna qol salýǵa jol ashyp otyr», - deıdi depýtat D. Nazarbaeva.

Onyń aıtýynsha, emdeý mekemeleriniń ózinde naýqastardy tegin dári-dármekpen qamtamasyz etý máselesine salaqtyq, nemquraılylyq etek alyp barady. Birqatar aýrýhanalarda tipti qoldaný merzimi ótip ketken, qomaqty qarajatty quraıtyn dárilerdi paıdalaný derekteri de málim bolǵan. Kámelet jasqa tolmaǵan balalarǵa qoldanýǵa bolmaıtyn dári-dármekterdi taǵaıyndaý, dárilerdi artyǵymen ótkizý, olardy baǵasyn arzan dárilermen almastyrý faktileri de oryn alǵan. «El óńirlerindegi kóptegen turǵyndar tegin dári-dármekti alý úshin 100 jáne odan da kóp shaqyrym jol júrýge májbúr. Sondyqtan da, bul másele asa ózekti bolyp tabylady», - dedi D. Nazarbaeva.