D. Nazarbaeva Shý alqabynda jabaıy qarasoradan dári-dármek shyǵaratyn zaýyt salýdy usynady
ASTANA. 13 qańtar. QazAqparat - Esirtki shıkizaty bolyp tabylatyn qarasoraǵa kózqarasty ózgertetin kez jetti. Bul úshin Shý alqabynda jabaıy qarasoradan paıdaly ónim alatyn zaýyt salý kerek.
Búgin Parlament Májilisinde ótip jatqan Úkimet saǵatynda depýtat Darıǵa Nazarbaeva osyndaı usynys jasady. Eske sala keteıik, depýtattar aldynda baıandama jasaǵan Іshki ister mınıstri Qalmuhanbet Qasymov elimizde esirtkiniń shıkizat bazasy bolyp tabylatyn Shý alqabynyń problemasyn sheshý qajettigin kótergen bolatyn.
D. Nazarbaeva Shý alqabynyń 140 myńǵa tarta gektarynan jyl saıyn 5 myń tonnaǵa jýyq marıhýana (esirtki zatyn) ázirleý yqtımaldylyǵyn alǵa tartty. «Men bizdiń qarasoraǵa qatysty kózqarasymyzdy tutastaı ózgertýdi usynamyn. Qarasora - bul krımınaldyq maqsattarda paıdalanylatyn esirtki zaty ǵana emes, bul sonymen qatar aýyl sharýashylyǵynyń túrli baǵyttaǵy paıdaly daqyly. Qarasoradan jasalatyn preparattar búginde álemde rakpen, JITS dertimen syrqattanǵandarǵa paıdalanylady. Máselen, bular Izraılde, Chehııa men Kanadada, Gollandııada qoldanylyp júr», - deıdi depýtat. Onyń aıtýynsha, qarasora este saqtaý qabiletine qatysty aýrýlarda, altsgeımer naýqastaryna qoldanylady. Sondyqtan da, álemniń birqatar elderinde qarasorany arnaıy ósirý qolǵa alynǵan. Sonymen birge, depýtattyń sózine qaraǵanda, qarasoradan álemde 25 myńǵa tarta ónimder shyǵarylady.
«Bizdiń quqyq qorǵaý organdarymyz qanshama jyldar boıy Shý alqabyndaǵy jabaıy qarasoramen kúresip keledi? Osy kúreske bıýdjetten qyrýar qarajat jumsaldy. Bul tıimdi me? Jyl saıyn sol baıaǵy saýaldar qaıtalanyp jatyr. Endeshe, búgingi kúni jabaıy qarasorany jaqsy, paıdaly maqsattarǵa, sonyń ishinde medıtsına, halyq sharýashylyǵy salalarynda paıdalanatyn ýaqyt jetti», - dedi D. Nazarbaeva.
Osyǵan oraı, depýtat Іshki ister mınıstrinen Shý alqabyndaǵy jabaıy qarasora qaptaǵan jerlerdi iri farmatsevtıkalyq kompanııalarǵa berýge qatysty kózqarasyn surady. «Ondaı kompanııalar osy alqapta zaýyt salyp, paıdaly ónimder shyǵaratyn edi. Árıne, bul úshin eń aldymen bizdiń zańnamamyzǵa ózgerister kerek», - dedi ol.
Óz kezeginde Іshki ister mınıstri Qalmuhanbet Qasymov Shý alqabyndaǵy jabaıy qarasora máselesi el úshin úlken problema ekenin atap ótti.
«Árıne, 140 myń gektar jerdi qorshap tastaý múmkin emes, sondyqtan odan taralatyn esirtki eldiń aýmaqtaryna ketip jatyr. Endeshe, buny sheshýdiń eki amaly bar. Onyń biri - alqaptyń túbegeıli kózin qurtý, ekinshisi - ony halyqtyq sharýashylyqta paıdalaný. Sondyqtan, bul máselege qatysty kez kelgen usynysty qoldaımyz. 2012 jyly Aýyl sharýashylyǵy mınıstrligi osyǵan uqsas arnaıy baǵdarlama qabyldaǵan edi. Alaıda, esh jumys atqarylmaı otyr», - deıdi Q. Qasymov.
