D.Nazarbaeva oqýlyqtarǵa sapasyz saraptama úshin Bilim mınıstrligin synǵa aldy
«Búgingi kúni bilim salasynda barlyq oqýlyqtar boıynsha saraptama nemquraıly jasalady. Nege nemquraıly? Óıtkeni, bul oqýlyqty jazǵan adamǵa da, saraptamasyn jasaǵan adamǵa da jáne ony ary qaraı mınıstrlik pen túrli deńgeılerge usynǵan komıssııalarǵa da jeke jaýapkershilik qarastyrylmaǵan. Bıýdjetten bólinetin qarajatqa shyǵarylǵan sapasyz oqýlyq úshin mınıstrlik qyzmetkerleriniń jeke ári tikeleı jaýapkershiligi joq. Sondyqtan da tikeleı jaýapkershilik bolmasa, bul salada ilgerileý degen de bolmaıdy», - dedi D.Nazarbaeva. Budan bólek, vıtse-spıker oqýlyqtardy tekserýmen aınalysatyn komıssııany da «jaýapkershilikti jýyp-shaıý» úshin qurylady degen synǵa aldy. Onyń aıtýynsha, bul tek óziniń jeke pikiri ǵana emes, depýtattyq korpýstyń ustanymy. «Sondyqtan meniń usynysym - jańa oqýlyqtardy engizýge asyqpaý kerek. Buny bir jylǵa keıin shegerip, keıin buǵan qaıta aınalyp soqpas úshin eń aldymen jaýapkershilikti kúsheıtý kerek. Barlyǵy túsinikti ári esepteýli bolýy kerek. Sonda ǵana biz osynda aıtylǵan sózderge senetin bolamyz», - dedi D.Nazarbaeva.