D.Nazarbaeva: Mektepterge oqýlyqtardyń ýaqytynda jetkizilýi mınıstrlik pen ákimdikterdiń qatań baqylaýynda bolýy kerek
ASTANA. QazAqparat - Bıyl 1 synyptyń barlyq oqýshylary biryńǵaı bazalyq oqýlyqpen oqıtyn bolady. Bul týraly búgin Qazaqstan bilim salasy qyzmetkerleriniń respýblıkalyq tamyz keńesinde QR Premer-Mınıstriniń orynbasary Darıǵa Nazarbaeva málim etti.
D.Nazarbaeva óz sózinde únemi talqylaý nysanyna aınalatyn taqyryp oqýlyqtar men olardyń sapasyna qatysty órbıtindigin basa aıtty.
«Taqyryp óte ózekti jáne bárimizge de jaqyn. Sebebi balalarymyzdyń jaqsy da sapaly oqyǵandyǵyn barlyǵymyz da qalaımyz. Bul máseleni sheshý de bizdiń basty nazarymyzda. Bıyl 1-synyptyń barlyq oqýshylary biryńǵaı bazalyq oqýlyqpen oqıtyn bolady. Bul oqýlyqtardy ázirleý barysynda buryn aıtylǵan kemshilikterdiń barlyǵy eskerildi. Búkil óńirlerdegi mektepter sapaly oqý-quraldarymen birdeı qamtamasyz etiletin bolady. Qazirgi ýaqytta biryńǵaı oqýlyqtardyń 95 paıyzy baspadan shyqty. Al olardyń mektepterge ýaqytynda jetkizilýi mınıstrlik pen ákimdikterdiń qatań baqylaýynda bolýy kerek», - dedi ol.
Sonymen qatar ol qazirgi ýaqytta 2-synyp oqýshylaryna oqýlyqtar daıyndaý jumysy bastalǵandyǵyn eskertip ótti.
«Bul jumystar joǵary deńgeıde oryndalýy tıis. Sebebi oqýlyqtarda qarapaıym grammatıkalyq ózge de qatelikter bolmaýy kerek», - dedi Darıǵa Nazarbaeva
