D.Nazarbaeva mekteptegi sport zaldaryn aýyl azamattarynyń da paıdalanýyna berýdi usyndy
ASTANA. QazAqparat - QR Premer-Mınıstriniń orynbasary Darıǵa Nazarbaeva mekteptegi sport zaldy aýyl azamattarynyń ıgiligine jaratýǵa múmkindik jasaýdy usyndy.
«Aýylda sport qalmady dese de bolady. Árıne, mınıstrlik sporttyq-saýyqtyrý keshenderin salaıyq dep aıtyp keledi. Biraq ondaı jobalarǵa qazir jergilikti atqarýshy organdarda qarajat tabyla qoıýy ekitalaı», - dep atap ótti D.Nazarbaeva mınıstrliktiń alqa májilisinde.
Onyń eske salýynsha, aýyl mektepterdiń enshisinde sporttyq ınfraqurylymdar bar.
«Bul jumysty kelisip, bylaı uıymdastyrýǵa bolar edi: keshke mektep oqýshylary sabaqtaryn aıaqtaǵannan keıin, ol zaldardy sportpen shuǵyldanǵysy keletin aýyl azamattaryna tegin ashylatyndaı jasasa. Árbir ákimmen kelisý qıyn bolmaıtyn shyǵar, sebebi zalǵa sporttyq jaraqtar satyp alýǵa kóp qarajat talap etilmeıdi», - dep atap ótti vıtse-premer.
D.Nazarbaevanyń pikirinshe, qazirgi ýaqytta dene shynyqtyrý jáne sport nysandaryn halyqqa qoljetimdirek etý qajet.
«Eger Sizder ólim-jitim men aýrý kórsetkishteri boıynsha statıstıkaǵa qaraıtyn bolsańyzdar, jaǵa ustaısyz. Bizdiń azamattar ózin-ózi óltirip jatyr dese de bolady. Sebebi, olarda bul jóninde bilim joq. Sosyn olar ózderiniń aǵzalaryn aıamaı qurtýdan jasqanbaıdy», - dedi Úkimet basshysynyń orynbasary.
«Bizdiń elde bar barlyq sport keshenderi men ǵımarattar, saraılar kez kelgen adamǵa esigin ashýy kerek. Stýdentterge, mektep oqýshylaryna, zeınetkerlerge, múgedekterge arnap, tarıfterdiń qoljetimdi kestesin qamtamasyz etken jón. Bul erejelerdi menshik formasyna qaramaı biryńǵaı, barlyǵyna ortaq etý qajet. Barlyǵy qoldaıdy dep esepteımin, sporttyq keshenderdiń ıeleri kelisedi, tek olarmen sóılesý qajet», - dep túıindedi sózin D.Nazarbaeva.
