D. Nazarbaeva: Májilis qazaqstandyq BAQ-ty qoldady

ASTANA. QazAqparat - Elektrondyq jáne baspa BAQ-ta medıtsınalyq qyzmet, dári-dármekti jarnamalaýǵa tyıym salý aqparat quraldarynyń medıa qyzmet naryǵyndaǵy básekege qabilettiligine nuqsan keltirer edi. QR Parlamenti Májilisiniń vıtse-spıkeri Darıǵa Nazarbaeva osyndaı pikir bildirdi.

- Darıǵa Nursultanqyzy, búginde keıbir qazaqstandyq buqaralyq aqparat quraldarynyń ókilderi farmatsevtıkalyq preparattar jarnamasyna tyıym salýǵa qatysty narazylyq bildirýde? Bul qanshalyqty negizdi dep oılaısyz?

- Elektrondyq jáne negizinen baspa BAQ-ta medıtsınalyq qyzmetter men dárilik zattardy jarnamalaýǵa tyıym salý birinshi kezekte medıa qyzmet naryǵyndaǵy olardyń básekege qabilettiligin tómendetedi.

Qazaqstannyń jarnama naryǵynyń qurylymynda farmatsevtıkalyq segmenttiń úlesi 20-22 paıyzdy nemese shamamen 6,2 mlrd. teńgeni quraıdy. Ári munda barlyq kólem telearnaǵa tıesili.

Osylaısha, zańnamaǵa engizilgen ózgerister nátıjesinde otandyq televıdenıe jarnamadan túsetin tabysynyń besten birin joǵaltady. Bul qazaqstandyq baǵdarlamalardy shyǵarý, shetelden tanymal teleónim satyp alý kólemin qysqartady.

Bul rette atalmysh tyıym Qazaqstanda kórsetiletin reseılik arnalarǵa qoldanylmaıdy.

Munyń bári otandyq arnalardyń tanymaldyǵyna keri áserin tıgizedi.

Budan basqa, bul ózgeristerdiń qajeti joq, ári qoıylǵan maqsattarǵa qol jetkizýge múmkindik bermeıdi. Dárigerdiń ruqsatynsyz shyǵarylatyn dárilik preparattardy jarnamalaýǵa qatysty qosymsha shekteý tutynýshylardy dári-dármek jaıly aqparat alý quqyǵynan aıyrady. Bul atalmysh taýarlardy jarnamalaýdyń jasyryn nysandary men tásilderiniń damýyna yqpal etetin bolady.

Retseptýrasy joq preparattardy jarnamalaý tolyqtaı qoljetimdi bolyp tabylady, bul álemdik praktıkada barynsha keń qoldanylady.

Dúnıejúzilik densaýlyq saqtaý uıymy «sanaly túrde baqylanatyn em alý» saıasatyn júrgizýde, soǵan sáıkes tutynýshy az-maz syrqattanǵan kezde ózdiginen em-dom qabyldaýǵa qatysty naqty aqparat alýǵa quqyǵy bar.

- Demek, Siz dárilik zattar men medıtsınalyq qyzmetterdi erkin jarnamalaýdyń jaqtastaryn qoldaısyz ǵoı?

- Iá, áriptesterimniń kópshiligi medıtsınalyq qyzmetter men dárilik zattardyń jarnamasyna tyıym salýdy negizsiz, orynsyz dep sanaıdy.

Sondyqtan Májilis depýtattary «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» QR Zańyna túzetýler engizip, qabyldaýǵa daýys berdi, bul túzetýde medıtsınalyq qyzmetter, aýrýdyń aldyn alý, em taǵaıyndaý, medıtsınalyq saýyqtyrý ádisteri men quraldaryn, dárilik zattardy, medıtsınalyq maqsattaǵy buıymdar men medıtsınalyq tehnıkany jarnamalaýǵa ruqsat berý kózdelgen.

Zań taıaý ýaqytta zańdy kúshine enedi.