D.Nazarbaeva: Bilim berý júıesinde álemdik ózgeristerdi zerdeleý ınstıtýty negiz qalaýy tıis
ASTANA. QazAqparat - Bilim berý júıesinde álemdik ózgeristerdi zerdeleý ınstıtýty negiz qalaýy tıis. Bul týraly búgin QR Parlamenti Májilisi Tóraǵasynyń orynbasary Darıǵa Nazarbaeva aıtty.
«Qazirgi álem jyldam ózgerýde jáne bilim berý júıesinde osy ózgerister monıtorıngin zerdeleý ınstıtýtyna mindetti túrde negiz qalanýy tıis», - dedi ol «Tehnıkalyq jáne kásiptik, joǵary bilim berý júıesinde ekonomıka salalary úshin kadrlar daıarlaýdyń sapasy men perspektıvalary týraly» parlamenttik tyńdaý barysynda.
Osy rette úlgi retinde kórshi Qytaı memleketiniń tájirıbesin ataǵan D.Nazarbaeva: «Eldi álemniń iri ekonomıkasyna aınaldyrýdaǵy qytaı ekonomıkalyq reformasynyń tabystylyǵy belgili bir dárejede bilim berý jáne joǵary mektepti zamanaýı sapaly reformalaýmen baılanysty. Qytaı reformasynyń basty ustanymy - jahandyq jáne óńirlik eńbek naryǵy qajettiligin eskerý», - dedi.
Onyń atap ótýinshe, Qazaqstandaǵy bıznestiń kadrlar daıarlaý úderisine qatysýy óte tómen bolyp otyr. Máselen, búgingi tańda joǵary bilim berý júıesinde jumys berýshilerdiń granttary boıynsha nebári 0,8 paıyz stýdent bilim alýda.
«Damyǵan elderde bul kórsetkish 30 paıyzǵa jetedi», - dedi D.Nazarbaeva.
