D.Nazarbaeva bes kúndik oqý aptasyn engizýge qatysty túsinikteme berdi (FOTO)
ASTANA. QazAqparat - QR Premer-Mınıstriniń orynbasary Darıǵa Nazarbaeva birinshi synyp oqýshylary úshin bes kúndik oqý aptasyn engizýge qatysty túsinikteme berdi.
«Memleket basshysy atap ótkendeı, bes kúndik oqý aptasy bıyl birinshi synyp oqýshylary úshin engiziledi. Sebebi, birinshi synyp órenderi «Nazarbaev Zııatkerlik mektepteri» AQ tarapynan jazylǵan oqýlyqtarmen alǵash ret mektepke barady. Bul mektepter kóp jyldan beri bilim naryǵynda qyzmet etýde jáne ózderin jaqsy jaǵynan tanytty. Olar óte myqty túlekterdi daıyndap shyǵarýda»,-dedi D.Nazarbaeva búgin Astanadaǵy № 81 «Astana English School» mamandandyrylǵan gımnazııasy muǵalimderimen jáne oqýshylarymen kezdesý barysynda.
Osy rette vıtse-premer atalǵan oqýlyqtar birtindep Qazaqstannyń barsha mektepterine engiziletindigin atap ótti.
«Birinshi synyp oqýshylaryna arnalǵan bul oqýlyqtar fýnktsıonaldyq saýattylyqty damytýdy, ıntegratsııalanǵan pánderdi qarastyrady. Osynyń esebinen jalpy oqý júktemesi azaıady. Bul oqýlyqtardyń arqasynda oqýshylar 1 qyrkúıekten bastap aptasyna bes kún oqıtyn bolady»,-dedi ol.
Sonymen qatar Úkimet basshysynyń orynbasary 2017-2018 oqý jylynda bes kúndik oqý aptasy ózge synyptarda engizile bastaıtyndyǵyn jetkizdi. Sol ýaqytqa deıin «Nazarbaev Zııatkerlik mektepteri» qajetti oqýlyqtardy daıarlaıtyn bolady.
