D. Nazarbaeva: Baspana máselesimen kezekte turǵandar týraly málimettiń ózi úlken kúmán týdyrady

Parlamentte  «Halyqty turǵyn úımen qamtamasyz etýdiń jaı-kúıi men perspektıvalary» atty taqyrypta ótken parlamenttik tyńdaýda Májilis depýtaty Darıǵa Nazarbaeva osylaı málim etti.

Sóz arasynda Darıǵa Nazarbaeva parlamenttik tyńdaýǵa ázirlik barysynda úlken jumystar atqarylǵanyn, birneshe otyrystar uıymdastyrylyp, memlekettik jaýapty organ basshylary tyńdalǵanyn, statıstıkalyq málimetter alynǵanyn aıtty. «Árıne, statıstıkalyq málimetter jetkilikti berildi. Alaıda, biz eń mańyzdy ári asa qajetti kórsetkishterdi ala almadyq. Máselen, biz barlyq oblystardan baspana kezeginde turǵandarǵa qatysty jaǵdaıdy kórsetetin málimetterge qol jetkize almadyq. Qostanaı, Mańǵystaý, Almaty, Atyraý oblystary týraly esh málimet ala almadyq. Al kelip túsken keıbir kórsetkishterdiń ózi úlken kúmán týǵyzady. Máselen, halqy eń kóp qonystanǵan Ońtústik Qazaqstan oblysynda baspanaǵa resmı kezekte bar-joǵy 10 myń adam ǵana tur. Al Shyǵys Qazaqstandaǵy kezekte turǵandar sany 15 myń 156 adamdy quraıdy. Osy kórsetkishterdi tereńirek tekserý kerek dep sanaımyz», - dedi D. Nazarbaeva.