D. Nazarbaeva áleýmettik medıtsınalyq saqtandyrýdy engizýdiń mánin túsindirip berdi

«Alda áleýmettik medıtsınalyq saqtandyrýdy engizý kútip tur. Osy taqyryp aınalysynda kóptegen talqylaýlar, túsindirýler júrip jatyr jáne keıbir aqparat kózderi burmalanǵan málimetter arqyly halyqqa úreı men qorqynysh týdyratyn derekterdi jetkizgen. Sondyqtan da bul baǵytta túsindirý kerek», - dedi D. Nazarbaeva.
Bundaı júıe elimizde buryndary iske qosylyp, alaıda tıisti deńgeıde júzege aspaǵanyn eske salyp ótken vıtse-premer, degenmen de medıtsınalyq saqtandyrý júıesin umyt qylý durys emes ekenin sóz etti. Bul turǵyda qatelikterdi eskerip, ony damyta túsý kerek ekenin jetkizdi.
«Barlyǵyn jaýyp tastaýdyń saldarynan, ókinishke qaraı, biz kóp jyldarǵa artta qalyp qoıdyq. Sondyqtan da, medıtsınalyq saqtandyrý degen ne? Bul - bárinen buryn medıtsınalyq mekemelerdi qarjylandyrý júıesi. Júıe medıtsınalyq mekemelerdi kútip ustaý men qarjyny ıgerýge emes, ıaǵnı tutynýshylar múddesine, qyzmetke, naýqastarǵa negizdelgen. Atap aıtqanda, saqtandyrý aqshasy emdelýshiniń sońynan erip júredi. Bul qyzmet barsha jumys isteıtin Qazaqstan turǵyndarynyń tólemi. Osy jaǵdaıda biz ózara kómektiń kassasyn quramyz»,-dedi ol.