D.Myńbaı: Jýrnalıstik ádep kodeksin jasaýǵa barlyq múddeli tulǵalar tartylýda
ASTANA. 13 shilde. QazAqparat - Jýrnalıstik ádep kodeksin jasaýǵa barlyq múddeli adamdar tartylýda.
Bul týraly búgin Aqordada Elbasy N.Nazarbaevtyń tóraǵalyǵymen ótken eldi áleýmettik-ekonomıkalyq damytý máselelerine arnalǵan keńeste QR Mádenıet jáne aqparat mınıstri Darhan Myńbaı aıtty, dep habarlady QR Prezıdentiniń baspasóz qyzmetinen.
«Sizdiń tapsyrmalaryńyzdy júzege asyrý úshin barlyq qajetti jumys júrgizilýde. Halyqtyń qolyna tez tıgizýdi jeńildetý úshin kitaptar sandyq formatqa kóshirilip jatyr. Jýrnalıster kodeksi ázirlenýde, ol úshin barlyq múddeli adamdar tartylyp otyr. Aqparat salasynda eńbek adamdaryna basa kóńil bólinetin bolady», - dep atap ótti D.Myńbaı.
Aıta keterligi, búgin Úkimet otyrysynda D.Myńbaı Memleket basshysynyń tapsyrmasyna sáıkes aǵymdaǵy jyldyń 1 qyrkúıegine deıin mınıstrlik eńbekke, adal kásibı tabysqa, Otanǵa qyzmet etýge, joǵary patrıottyq sezimderge oń kózqaras qalyptastyratyn otandyq áleýmettik-mádenı ónimderdi jańǵyrtýdyń salalyq besjyldyq josparyn ázirlep, qabyldaıtyndyǵyn atap ótken bolatyn.
