D.Myńbaı Mádenıet jáne aqparat salasynyń úzdikterine memlekettik nagradalar tabystady
Olar Elbasy N.Nazarbaevtyń Jarlyǵymen elimizdiń mádenıeti men aqparat salasyna qosqan aıryqsha úlesteri úshin «Qurmet» ordenimen, «Eren eńbegi úshin» medalimen, Qazaqstannyń eńbegi sińgen mádenıet qaıratkeri ataqtaryna jáne QR qurmet gramotasyna ıe boldy.
«Bul marapatqa adam jaıdan jaı kelmeıdi. Ol - eren eńbektiń, ter tógýdiń, bilimniń arqasy. Qazaqstannyń mádenıetin búkil álemge tanytýǵa úlken úles qosyp júrgen adamdarǵa búgin osyndaı úlken marapattar berilip jatyr», - dep túıindedi sózin mınıstr.
Osylaısha, keýdelerine «Qurmet» ordenin taqqandardyń qatarynda «Habar» AQ tóraǵasynyń birinshi orynbasary Almagúl Ahmetjanova, «Túrkistan» gazetiniń qyzmetkeri Tynyshbek Daırabaı, «Has Sanat» óner galereıasynyń dırektory Janat Eńsebaeva, «Egemen Qazaqstan» gazeti redaktorynyń orynbasary Samat Musa jáne taǵy basqalary bar. Al «Eren eńbegi úshin» medaldaryna «Qazaqstan» ulttyq arnasy baǵdarlamalar bóliminiń bastyǵy Sáýle Jırenshına, QR Mádenıet jáne aqapart mınıstrligi aqparat jáne muraǵattar komıteti basshysynyń orynbasary Qýat Borashev, «Egemen Qazaqstan» gazetiniń korrektory Zarıpa Tólesheva jáne taǵy basqalary laıyq dep tanylypty. Sonymen qatar Qazaqstannyń eńbegi sińgen mádenıet qaıratkeri ataqtaryna belgili kúıshi Nurken Áshirov, «Shabyt» baıqaýynyń laýreaty, bıshi Elmıra Bekqalı, sýretshi Tileýberdi Bınashev ıe boldy.
«Elbasy atap ótkenindeı, eń basty qundylyǵymyz - Táýelsizdik. Men barlyqtaryńyzdy Táýilsizdik meıramymen taǵy da quttyqtaı otyryp, alda atqarylatyn jumystaryńyzǵa tabys, otbasylaryńyzǵa amandyq tileımin. Elimizdiń qol jetkizgen barlyq jetistikterine barlyqtaryńyzdyń da úlesterińiz bar. Qaı elde de mádenıet, óner, aqparat, ádebıetsiz eshqashanda ekonomıka alǵa jyljymaıdy. Óıtkeni biz halyqqa rýh beremiz», - dedi QR Mádenıet jáne aqparat mınıstri D.Myńbaı.
Eske sala keteıik, bunyń aldynda el Táýelsizdigi merekesine oraı, Elbasy Nursultan Nazarbaev jáne QR Memlekettik hatshysy M.Qul-Muahmmed búgin Aqordada Sultan Orazaly, Júrsin Erman, Qýat Shildebaı, Bıbigúl Jeksenbaı, Aqan Sataev, Dilnáz Ahmadıeva syndy mádenıet jáne óner qaıratkerlerine memlekettik nagradalardy tabystaǵan bolatyn.
