D.Kozlov aýrýhanadan tergeý abaqtysyna aýystyryldy
ASTANA. 11 qyrkúıek. QazAqparat - Aqmola oblysynda oryn alǵan iri jol apaty kezinde 16 adamnyń mert bolýyna kináli dep tanylyp otyrǵan Dmıtrıı Kozlov búgin elordadaǵy tergeý abaqtysyna aýystyryldy.
Bul týraly QazAqparat tilshisine Aqmola oblystyq ІІD basshysynyń baspasóz hatshysy Gúlnar Pınchýk málim etti.
«Qazirgi ýaqytta ol Astanadaǵy medıtsınalyq mekemelerdiń birinde emdelgennen keıin tergeý abaqtysyna aýystyryldy. Eki aıǵa deıin tutqynǵa alý sharasy qabyldandy. Ol bir aptaǵa jýyq emdelgen bolatyn. Em qabyldaý merzimi aıaqtalǵannan keıin D.Kozlov birden Astana qalasynyń tergeý abaqtysyna qamaldy», - dedi ol.
Jol-kólik apatyna kináli 34 jasar D.Kozlovqa qatysty eki qylmystyq is qozǵaldy. Birinshisi, QR Qylmystyq kodeksiniń 296-baby - eki jáne odan da kóp adam ólimine ákelip soqtyrǵan jol júrý erejelerin buzý áreketi, ekinshisi, 297-bap - oqıǵa bolǵan jerden qashyp ketý.
Esterińizge sala keteıik, tamyzdyń 19-y kúni Almaty - Ekaterınbor tas jolynyń 1309 shaqyrymynda iri jol-kólik apaty boldy. Júk mashınasyn basqarǵan Astana qalasynyń turǵyny D.Kozlov joldyń qarsy jaq betine shyǵyp ketip, jolaýshylar avtobýsymen soqtyǵysty. Avtobýstyń artynda kele jatqan «Audi-100» kóligi de apatqa ushyrady. Osy jol-kólik apatynda 16 adam qaza taýyp, 20-dan astamy túrli jaraqattar aldy. Oǵan kináli D.Kozlov oqıǵa ornynan qashyp ketken bolatyn.
