D. Qonaev týraly estelikter shyqqanymen áli túbegeıli zertteýler joq - akademık Kópjasar Náribaev
ALMATY. Aqpannyń 25-i. QazAqparat /Erlik Erjanuly/ - Qonaevtaný ilimi qalyptasyp kele jatyr. Bul jaıly keshe Almatydaǵy D.Qonaev murajaı-úıinde ótken "D.A.Qonaev jáne onyń ýaqyty" dep atalatyn dóńgelek ústel jıynynda aıtyldy,
dep habarlaıdy QazAqparat.
"Ázirge qoldan kelgen dúnıeni iske asyryp jatyrmyz. Biraq Dımekeńniń ataq-abyroıyn, sińirgen eńbegin, tulǵalyq iriligin túgel dáriptep boldyq dep aıta almaımyn. Birinshiden, estelikter bar, kitap shyqty. Ekinshiden, gazet-jýrnaldarda árkimniń maqalalary shyǵyp jatyr. Biraq túbegeıli zertteý joq. Tulǵalyǵyn, ǵulamalyǵyn, danyshpandyǵyn, daralyǵyn kórsetetin. Sondaı-aq sńirge eńbegin túgeldeı dáriptep beretin shyǵarmalar jazylmady", deıdi QR UǴA akademıgi, ekonomıka ǵylymynyń doktory Kópjasar Náribaev. Professordyń aıtýynsha, 2012 jyly ómirge kelgenine 100 jyl tolatyn Dinmuhamed Ahmetulynyń mereıtoıyn óz deńgeıinde atap ótý úshin úkimet qaýly qabyldap, atqarylatyn is-sharalardy bekitýi kerek.
"Qazir Qonaevtaný" degen ilim qalyptasyp kele jatyr. D. Qonaev atyndaǵy ýnıversıtettiń ujymy Qonaevtaný degen pán engizip, baǵdarlama jasap birqatar azamatqa jastar arasynda áńgime júrgizip jatyr. Bul jetkiliksiz. Qonaevtyń ómirin, qyzmetin, eńbegin zertteý úshin arnaıy ǵylymı ortalyq kerek. Kózin kórgen jáne zamandas adamdardyń jazǵandary - kórip edim, sóılesip edim, maǵan aqyl-keńes berip edi, degen estelik qana. Bizge D. Ahmetulynyń beınesin, ishki jan dúnıesin, tulǵasyn ashý qajet. Bul ońaı sharýa emes. Oǵan ǵalymdardy tartý kerek", deıdi Kópjasar Náribaev.
