D. Qonaev murajaı úıinde Sultan Jıenbaevtyń 90 jyldyǵyna arnalǵan kórme ashyldy
MATY. 22 shilde. QazAqparat /Erlik Erjanuly/ - Almatydaǵy D. Qonaev murajaı-úıinde soǵys jáne eńbek ardageri, kórnekti memleket jáne qoǵam qaıratkeri Sultan Súleımenuly Jıenbaevtyń 90 jyldyq mereıtoıyna arnalǵan kórme ótip jatyr.
«Jyldar jyljyp, urpaqtar aýysyp ótkenge degen baǵa da ózgeredi. Áıtkenmen, keshegi qandy qasap jıhangerlik soǵystaǵy jeńistiń narqyn eshteńe ózgerte almas. Biz onda ózimiz úshin emes, búkil álemdi aman alyp qalý úshin shaıqastyq. Qoldan kelmestiń qısynyn keltirip jeńip shyqtyq», - deıdi polkovnık Sultan Jıenbaev. Maıdanda kórsetken eren erlikteri úshin 2 márte Uly Otan soǵysynyń 1-shi dárejeli ordenimen jáne «Otan úshin», «Germanııany jeńgeni úshin», «1941-1945 jyldardaǵy qajyrly eńbegi úshin» medaldarymen marapattalǵan maıdanger 1921 jyly 22 maýsymda Almaty qalasynda dúnıege kelgen bolatyn. Eńbek jolyn Túrkistan - Sibir temir jolynyń Almaty bólimshesiniń jumysshylardy jabdyqtaý bóliminde bastaǵan ol 1959-60 jyldary Frýnze (qazirgi Medeý) aýdanynyń birinshi hatshysy, 1960-1962 jyldary Qazaqstan Kompartııasy Ortalyq Komıtetinde bólim bastyǵy, 1962-1970 jyldary Qazaq KSR Saýda mınıstri, 1970-1984 jyldary Qazaq KSR Mınıstrler Keńesi Tóraǵasynyń orynbasary qyzmetin atqardy.
Almatydaǵy Jibek joly men Abylaı han kósheleriniń qıylysyndaǵy Ortalyq ámbebap dúkeniniń (qazirgi «Zańǵar») salynýyna uıytqy bolyp, oǵan jetekshilik jasaǵan Sultan Súleımenuly 3 dúrkin Sotsıalıstik Eńbek Eri atanǵan Dinmuhamed Ahmetuly Qonaevtyń aınymas serigi, adal inisi boldy. El aǵasymen 25 jyl birge jumys jasap, 30 jyl bir úıde kórshi turǵan S. Jıenbaevtyń Qazaqstannyń ekonomıkalyq jaǵynan damyp, halqymyzdyń ál-aýqatynyń artýyna qosqan zor eńbegin Qazaqstan Prezıdenti Nursultan joǵary baǵalap, qaıratkerdiń 70, 80, 85 jasqa tolǵan mereıtoıynda arnaıy quttyqtaǵan bolatyn. Sonyń birinde: «Sizdiń elimizdiń ekonomıkalyq jaǵdaıyn damytýǵa, adamdardyń ál-aýqatyn arttyrýǵa qosqan úlesińiz orasan zor. ... Aýyr jaraqat alyp, elge oralǵannan keıingi ýaqytta da Siz abyroıly ómir súrip, qaı salada eńbek etseńiz de, iske degen yjdahatyńyzben, iskerligińizben, qajyr-jigerińizben, zor uıymdastyrýshylyq qabiletińizben erekshe tanyldyńyz. Memlekettik basqarý organdarynda joǵary laýazymdy qyzmetter atqarǵan Sizdiń elimiz ekonomıkasynyń san alasynyń órkendeýine qosqan úlesińiz úlken. Osy jyldar ishinde Sizden taǵylym alǵan talaı azamat bilikti maman, bilgir uıymdastyrýshy bolyp qalyptasty»,- dep erekshe iltıpat bildirgen edi.
