D.Qonaev memleket jáne qoǵam qaıratkerine tán qasıettiń joǵary úlgisin kórsetip ketti - Asyly Osman
ALMATY. 12 qańtar. QazAqparat /Erlik Erjanuly/ - Tulǵa bolý úshin adamnyń tula boıy adaldyqqa, shyndyqqa, adam balasyna taǵdyrdyń bergen qasıetine toly bolý kerek.
Qazaqstan halqy Assambleıasynyń múshesi, «Memlekettik tilge - qurmet» birlestiginiń tóraıymy Asyly Osman búgin Almatyda kórnekti memleket jáne qoǵam qaıratkeri Dinmuhamed Qonaevtyń eskertkish músininne gúl shoǵyn qoıý rásimi kezinde osylaı aıtty.
«D. Ahmetuly jaratylysy bólek jan edi. Onyń erekshe qasıeti eshkimdi bólip-jarmaıtyn. Qanshalyqty qıyn jaǵdaı bolsa da eldi birlikte-teńdikte ustaı bildi. Ómirden ozsa da adam artynda qalǵan baılyǵymen emes qoǵamǵa, elge jasaǵan eńbegimen este qalatynyn aıqyn kórsetip otyr. Qonaevtyń kishiligi de, qarapaıymdylyǵy da, kisiligi de bar edi. Ol kez kelgen adammen meıli ol qoıshy, kenshi, ǵalym bolsyn ortaq til taýyp, jaqyn tartyp janasa sóılesetin», deıdi A. Osman. Onyń aıtýynsha, adam dúnıege kelgennen keıin eń aldymen - Adam bolýy kerek. Ol jeke basynyń múddesin emes, qoǵamnyń múddesin oılaǵanda ǵana - Tulǵa bolady. Qonaev úlken árippen jazylatyn - Adam edi. Dinmuhamed Qonaevtyń boıynda Tulǵaǵa qajetti qasıettiń bári boldy. Onyń bári «Qalanyń jaqsy bolýy kóshesinen, balanyń jaqsy bolýy sheshesinen» degen qazaqtyń ataly sózinde aıtylǵandaı otbasynda alǵan tárbıeniń jemisi deýge bolady.
