D.Qadyrbaev pen A.Tájaıaqovqa qatysty sot isi 2015 jyldyń qańtarynda bastalýy múmkin
ASTANA. 9 qańtar. QazAqparat - Boston marafonynyń máresinde bolǵan jarylysqa qatysty isti tergeýge kedergi keltirdi dep aıyptalǵan Dıas Qadyrbaev pen Azamat Tájaıaqovqa qatysty sot isi protsesi 2015 jyldyń qańtarynda bastalýy múmkin, dep habarlady Reseıdiń «Jańalyqtar» aqparat agenttigi amerıkalyq sottaǵy aıyptalýshylardyń qorǵaýshysyna silteme jasap.
«Taraptar atalǵan is tyńdaýyn 2015 jylǵy qańtardyń sońǵy aptasyna qoıýdy suraýda. Taraptar tyńdaý shamamen 2-3 aptaǵa sozylady dep esepteýde», - delingen Massachýsetstiń federaldy sotyna jiberilgen ótinishte.
Eske sala keteıik, 2013 jyldyń 15 sáýirinde Boston marafonynda eki jarylys oryn alyp, saldarynan 3 adam ajal qushty, 200-ge jýyǵy japa shekti. Keıin polıtsııa lańkesti jasaǵan eki kúdiktiniń izine shyǵyp, olar AQSh-ta zańdy túrde turyp jatqan Soltústik Kavkazdyń týmasy aǵaly-inili Tamerlan men Djohar Tsarnaevtar bolyp shyqty. Tártip saqshylarymen qaqtyǵys barysynda T. Tsarnaev qaza boldy. Al 19 jastaǵy D. Tsarnaev kóp uzamaı qolǵa tústi. Eger onyń kinási dáleldense, ol ómir boıy abaqtyǵa toǵytylady nemese ólim jazasyna kesiledi.
Osy lańkestik is boıynsha Tsarnaevtyń úsh dosy qazaqstandyq Dıas Qadyrbaev pen Azamat Tájaıaqov jáne amerıkalyq Robel Fılıpposke Boston marafonynyń máresinde bolǵan jarylysqa qatysty isti tergeýge kedergi keltirdi dep aıyp taǵyldy.
Qazaqstandyq stýdentterdiń kinási anyqtalatyn bolsa, onda olar tergeýge kedergi keltirgenderi úshin 20 jylǵa jáne sóz baılasqandary úshin 5 jylǵa bas bostandyqtarynan aıyrylýy, sonymen qatar 250 myń dollar aıyppul taǵylyp, 5 jylǵa deıin quqyq qorǵaý organdarynyń ashyq qadaǵalaýynda bolýy múmkin.
