D.Gýrtskaıa QR Prezıdentine shynaıy rızashylyǵyn bildirdi
ASTANA. QazAqparat - Búgin QR Prezıdenti janyndaǵy Ortalyq kommýnıkatsııalar qyzmetinde Reseıdiń estrada juldyzy Dıana Gýrtskaıanyń qatysýymen baspasóz máslıhaty ótti. Shara barysynda ol MýzTV syılyǵyn tabys etý saltanatty sharasyna qatysty oıymen bólisip, BAQ ókilderiniń saýaldaryna jaýap berdi.
«Eń aldymen el Prezıdenti Nursultan Ábishuly Nazarbaevqa álemdik deńgeıdegi MýzTV syılyǵyn elordada ótkizýge múmkindik bergeni úshin shynaıy alǵysymdy bildiremin. Men reseılik ánshilerdiń ishinen eń birinshi bolyp elordalaryńyzǵa kelip otyrmyn. Qalada merekelik kóńil-kúı seziledi», - dedi ol.
Ánshiniń atap ótýinshe, aǵymdaǵy jyly MýzTV syılyǵyn tabys etý sharasynyń Qazaqstan astanasynda ótetindigin reseılik estrada juldyzdary jyly qabyldaǵan.
Sonymen qatar ol erteń elordadaǵa zaǵıp balalarǵa arnalǵan mektep-ınternatqa baryp, kezdesý ótkizetindigin atap ótti. «Onda kontsert bolatyndyǵyna senimdimin. Balalar arnaıy kontserttik baǵdarlama ázirlep otyr. Men de án aıtyp, ózimniń ómirim jaıynda shynaıy áńgimelep beretin bolamyn», - dedi D.Gýrtskaıa.
Onyń aıtýynsha, MýzTV syılyǵyn tabys etý saltanatty sharasy qarsańynda uıymdastyrylatyn gala-kontsertke Qazaqstan men Reseıdiń 70-ke jýyq ánshisi qatysyp, olar 100-ge tarta án oryndaıtyn bolady.
