D. Gaag: 10 jyldan keıin bolatyn jarystarǵa jospar qurý qajet
ASTANA. QazAqparat - Qazaqstandyq trıatlonnyń eń tanymal ókili Dmıtrıı Gaag áýesqoı jáne kásibı sporttyń baılanysy men trıatlonshylardyń jańa býyny jaıly pikirin bildirdi, dep habarlaıdy QazAqparat tilshisi.
Ǵasyrlar toǵysynda Qazaqstan álemge boks, velosport, aýyr atletıka, kúres jáne trıatlon sportymen tanymal boldy. 1999-2004 jyldar aralyǵynda otandasymyz Dmıtrıı Gaag álem chempıony, Álem Kýbogynyń eki dúrkin ıegeri atanyp, álemniń eń úzdik trıatlonshysy atandy. Olımpıada oıyndarynda joly bolmasa da baǵyndyrǵan belesteri kóp edi. Sportshynyń aıtýynsha, Qazaqstan men Reseıdiń trıatlon sportyndaǵy jaǵdaı óte uqsas.
«Biraq qazir Olımpıadadan altyn alamyz dep armandaý erte. Bul sportta bárin aq paraqtan bastaý kerek. Qazirgi alty jasar balalarǵa 2028 jylǵy Olımpıada oıyndarynyń chempıony dep qaraýymyz kerek. Búgingi jarystardy emes, 10 jyldan keıin bolatyn saıystarǵa jospar qurý qajet»,- deıdi, Dmıtrıı Gaag.
Qazir qazaqstandyq sportshy Reseı men Sankt-Peterbýrgta trıatlon jattyqtyrýshysy bolyp qyzmet etip júr.
«Men týǵan jerimde bul sporttyń damyp kele jatqanyna qýanyp otyrmyn. Astana qalasy álemdik trıatlonnyń astanasyna aınalyp keledi. Qazaqstandaǵy eń myqty trıatlon mektebi Kókshetaýda turaqty jumys istep tur. Al jýyrda qurylǵan trıatlon federatsııasy sporttyń damýyna úlken úles qosatynyna senimdi. Eń bastysy mektepter arasynda jarystardy údetip, jas býynnyń daıyndyǵyna kóńil aýdarý qajet. Al 5-6 jasar balalardy júzýge úırete berý kerek. Trıatlonda sýda júzý óte mańyzdy. Sportshy júzý jarysynda alǵa shyqsa júgirýmen velojarysta ońaı bolady. Qazir elimizde áýesqoı trıatlon jaqsy damyp keledi. Qazaqstandyq sportshylar Ironman jáne Half-Ironman áýesqoı týrnırlerinde top jaryp júr. Demek bul sporttyń bolashaǵy bar», - dep bapker sózin qortyndylady.
