D.Erenshinov «Azamattarǵa arnalǵan úkimet» memlekettik korporatsııasynyń tóraǵasy bolyp taǵaıyndaldy

ASTANA. QazAqparat - QR Premer-Mınıstriniń orynbasary Darıǵa Nazarbaevanyń basshylyǵymen ótken «Azamattarǵa arnalǵan úkimet» Memlekettik korporatsııasy» kommertsııalyq emes aktsıonerlik qoǵamynyń dırektorlar keńesiniń birinshi otyrysynda memlekettik korporatsııanyń basshysy bolyp Erenshinov Danııar Qaǵazbekuly taǵaıyndaldy.

Otyrysqa dırektorlar keńesiniń músheleri - memlekettik qyzmet isteri boıynsha, ulttyq ekonomıka, ádilet, densaýlyq saqtaý jáne áleýmettik damý, bilim jáne ǵylym, ınvestıtsııalar jáne damý boıynsha mınıstrlikteriniń basshylary qatysty.

Jıyn barysynda atqarýshy organ quramy bekitildi.

«Azamattarǵa arnalǵan úkimet» Memlekettik korporatsııasy» kommertsııalyq emes aktsıonerlik qoǵamy Elbasynyń «100 naqty qadam» Ult josparyn júzege asyrý aıasynda quryldy. Ol óz jumysyn 2016 jyly 11 sáýirde bastady.