D. Amantaı «Jaýjúrek myń balanyń» qazaqsha nusqasy kórermenge qolaıly ýaqytta nege kórsetilmeıtindigin aıtyp berdi

Alaıda, fılmniń memlekettik tildegi nusqasyna suranystyń kóptigine qaramastan, kórermenge qolaıly ýaqytqa únemi oryssha nusqasy qoıylyp júr. Kınoteatrlardaǵy osy keleńsizdikke «Qazaqfılm» nege shara qoldanbaıdy?». «Jas qazaq» gazeti (basylymnyń 11 mamyr kúni shyqqan sanynda jazyldy) Sh.Aımanov atyndaǵy «Qazaqfılm» kınostýdııasynyń bas redaktory Dıdar Amantaıǵa osyndaı suraq joldady.

Oǵan kınostýdııanyń bas rejısseri bylaı dep jaýap qaıyrǵan: «Birinshiden, «Qazaqfılmniń» jekemenshik kınoteatry joq. Ekinshiden, memlekettik kınoteatr taǵy joq. Jekemenshik kınoteatrlar fılmderdiń kórsetilý ýaqytyn ózderi belgileıdi. Olardyń kópshiligi «Qazaq tilindegi fılmderge kórermen kelmeıdi, aýdıtorııany joǵaltamyz»,-dep qorqady. Praım-taımǵa kóbinese amerıkandyq blogbasterlerdiń qoıylýy sondyqtan. Biz qazir kınoteatrlarǵa habarlasyp, fılmniń qazaqsha nusqasyn kóbeıtip, kórermenge yńǵaıly ýaqytta qoıylýyn talap etip jatyrmyz».

Al «Qazaq ádebıeti» gazetine (11 mamyrdaǵy sany) «Jaýjúrek myń bala» fılminiń rejısseri, buǵan deıin «Reketır», «Adasqandar», «Aǵaıyndy», «Lıkvıdator» fılmderin túsirgen Aqan Sataev, atalmysh kartına jáne óziniń ózge de týyndylary, sondaı-aq aldaǵy josparlary týraly egjeıli-tegjeıli baıandap bergen.

Onyń aıtýynsha, «Jaýjúrek myń balanyń» stsenarııiniń on eki nusqasy bolǵan. Túsirý tobynan bólek, tarıh jóninde, til jóninde keńesshiler jumys istegen.

«Jetisine bir ret jınalys jasap, talqylap turdyq. Odan tehnıkalyq jumystarǵa sheteldik myqty-myqty degen mamandar aralasty. Brıtandyq skrıpt doktor Kler Daýns degen kisi stsenarııdi qalypqa keltirdi. Bul kisi ataqty «Birjoly Amerıkada...» (Once upone a time in America») fılminde jumys istegen. Tájirıbesi mol maman. Biz úshin úlken mektep boldy. Kóp nárse úırendik dep oılaımyn. Montajyn Nıkolas Trambasevıch pen Krıstofer Bell jasady.  Nıkolas «Taksı» («The taxi») fılminiń, Krıstofer «Bornnyń sharty» («The Bourne Ultimatum») fılminiń montajyn jasaǵan adamdar. Bul jigitter de ózderiniń sheberlikterin kórsete aldy. Endi osynshama eńbekpen jasalǵan  kınony halyq jaqsy qabyldaýy tıis dep oılaımyn. Jaqsy qabyldap jatqan sekildi. Allaǵa shúkir! Tipti ınternet saıttarynyń birinde bir orystyń qyzy: «Men qazaq bolmasam da, qazaqstandyq bolǵanymdy maqtan etemin» dep pikir qaldyrypty. Bul biz úshin qýanysh. Endi dál osylaı shetel de qabyldap jatsa, nur ústine nur bolar edi», - deıdi ol.

Rejısserdiń aıtýynsha, qazir kartına Kann festıvaline qatysý úshin daıyndalýda.