D.Amantaı: «Qunanbaı» - ulttyq aýqymdaǵy fılm
ASTANA. QazAqparat - Búgin «Qazmedıa» ortalyǵynda qazaqtyń uly aqyny Abaıdyń ákesi - Qunanbaı Óskenbaıulynyń ónegeli ómirinen syr shertetin «Qunanbaı» tarıhı fılmi buqaralyq aqparat quraldary úshin arnaıy kórsetildi.
«Ózderińizge belgili, Qazaqstan Respýblıkasy Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy «Qunanbaı» týyndysyn jaryqqa shyǵardy. Fılmniń rejısseri Qazaqstannyń halyq ártisi, memlekettik syılyqtyń laýreaty Dosqan Joljaqsynov», - dedi búgin fılm kórsetiliminen keıingi brıfıngte «Qazaqfılmniń» vıtse-prezıdenti, bas redaktory Dıdar Amantaı.
Onyń atap ótýinshe, Qunanbaı obrazy - óte kúrdeli obraz. Ol orystyń nızamyn, dala tártibin jáne sharıǵat jolyn qatar ustanǵan, el basqarǵan, qazaqty ilgeri ozdyramyn, el qylamyn dep eńbek etken aıaýly tulǵa.
«Qunanbaı obrazy Muhtar Áýezovtiń «Abaı joly» romanynan kórinedi. Biraq, Dosqan aǵamyzdyń fılmi «Abaı jolynyń» jelisi boıynsha emes, Qunanbaı týraly derekterden quralǵan stsenarıı. Bul - ulttyq aýqymdaǵy fılm. Bul romantıkalyq saryndaǵy saǵynyshqa toly fılm. Bul - dalanyń sol kezdegi almaǵaıyp zamanda, jaýgershilik dáýiri aıaqtalyp, qazaqtyń jańa zamanǵa aıaq basqan kezindegi Abaıdyń dáýirin aıqyndaıtyn fılm», - dedi ol.
