D. Ahmetov tarbaǵataılyqtarǵa balyq aýlaý boıynsha jańa júıeni tanystyrdy

ASTANA. QazAqparat - Shyǵys Qazaqstan oblysy ákimi Danıal Ahmetov Tarbaǵataı aýdanynda issaparmen bolyp, balyqshy aýyldardyń turǵyndarymen kezdesti, dep habarlaıdy Altaynews.kz.

Aýdandaǵy Tuǵyl jáne Baıtoǵas aýyldarynyń halqy balyq aýlaıdy. Ásirese, Baıtoǵas aýylynda 600-den astam adam osy kásippen otbasyn asyrap keledi. Al Tuǵyl aýylynyń balyqshylary «Rybakı Zaısana» atty óndiristik kooperatıvke birigip, jumys istegenderine 15 jyldan astam ýaqyt bolǵan.

Aýdan ákiminiń orynbasary Sáýmen Jaqaevtyń aıtýynsha, óndiristik uıym 300 adamdy jumyspen qamtyp otyr. Ázirge kooperatıvke múshe 175 adamnan tek 40 balyqshy ǵana jeke kásipker retinde tirkelgen.

Oblys ákimi Danıal Ahmetov áýeli Tuǵyl aýylyndaǵy «Rybakı Zaısana» kooperatıviniń óndiris oshaqtaryn aralap, ondaǵy balyq etin óńdeý tsehynyń jumysymen tanysty. Kooperatıv ujymymen kezdesýinde oblys basshysy jańa ózgeristerdiń qarapaıym balyqshy úshin qaı jaǵynan tıimdi bolatynyn egjeı-tegjeıli túsindirdi.

«Burynǵy júıe qandaı bolǵanyn bilesizder. Balyq aýlaý lıtsenzııasy tek qolynda óńdeıtin tsehy bar adamdarǵa ǵana beriletin. Barlyqtaryńyz sol tsehtyń ıesine jumys istep keldińizder. Basqasha aıtqanda, kooperatıv basshysyna týra maǵynasynda táýeldi boldyńyzdar. Bıyl aýylǵa 842 tonna kóleminde shekteme bermekpiz. Biraq bul shektemeden kooperatıvke jeke kásipker retinde tirkelgen árbir balyqshy úlesin alady. Al eger kooperatıvten shyǵatyn bolsa, ózine tıesili úlesin birge ala ketedi. Mundaı júıeni balyqshylardyń kooperatıv quryltaıshylaryna táýeldiligin joıý úshin oılastyrdyq.

Árıne, qalyptasqan júıeni ózgertý ońaıǵa túspesi anyq. Qazirgi tańda Aýyl sharýashylyǵy mınıstriligimen osy tóńirekte tyǵyz jumys istep otyrmyz. Al qarapaıym balyqshylar óz kezeginde jeke kásipker retinde tirkelip, kól baılyǵyn ynsappen paıdalanýy qajet», - dedi oblys ákimi.

Shyǵys Qazaqstan oblysy ákimi ár balyqshy jeke kásipker retinde mindetti salyǵyn ýaqtyly tólep, aýlanǵan balyqtyń ornyn shabaqpen toltyryp otyrsa, shekteme mólsherin asyrmasa, eshqandaı tekserý kedergi bolmaıtynyna sendirdi.

Balyqshylar qural-jabdyq alýǵa beriletin nesıeniń kepil talaptaryn oryndaý qıynǵa soǵyp otyrǵanyn jetkizdi. Bul máseleni sheshý aýdan ákimi Dildábek Orazbaev pen «Aýyl sharýashylyǵyn qarjylaı qoldaý qory» AQ-nyń oblystyq fılıalynyń ókilderine júkteldi.