Tsıýrıhte Qazaqstannyń ınvestıtsııalyq tartymdylyǵy tanystyryldy
Іs-sharaǵa Syrtqy ister mınıstrligi Investıtsııalar komıtetiniń tóraǵasy Baqyt Batyrshaev bastaǵan delegatsııa qatysty. Onyń quramyna Shymkent qalasynyń ákimdigi, «Kazakh Invest» Ulttyq kompanııasy, «Astana» Halyqaralyq qarjy ortalyǵy (AHQO), «Jolaýshylar tasymaly» AQ men Qazaqstan fermerler odaǵynyń ókilderi kirdi.
Shveıtsarııa tarapynan bank jáne qarjylyq qyzmet, konsaltıng, farmatsevtıka, mashına jasaý, hımııa ónerkásibi, qurylys, AKT, kólik jáne logıstıka salasyndaǵy 40-tan astam kompanııa ókilderi qatysty.
Kezdesýge qatysýshylar Qazaqstannyń ár túrli salalardaǵy ınvestıtsııalyq múmkindikteri týraly, sheteldik ınvestıtsııalardy tartýda Qazaqstan Úkimetiniń jańa sharalary týraly habardar etildi. Qazaqstandyq taý-ken, hımııa, munaı-hımııa, azyq-túlik jáne basqa salalar, sondaı-aq onyń damyp kele jatqan tranzıttik áleýeti Shveıtsarııa kompanııalarynyń qyzyǵýshylyǵyn týdyrdy. Qarjy jáne bank qurylymdary AHQO-nyń qyzmetine erekshe qyzyǵýshylyq bildirdi.
Qazirgi tańda Qazaqstanda Glencore, Philipp Morris, ABB, Rieter, Schindler, Bühler, Leica, Nestlé, Roche, Novartis, Syngenta, Ammann Group sııaqty 40-qa jýyq shveıtsarııalyq kompanııa jumys isteıdi.
2005 jyldan 2018 jylǵa deıingi Shveıtsarııadan Qazaqstanǵa tartylǵan ınvestıtsııalardyń jalpy kólemi 23,2 mlrd AQSh dollaryn qurady. 2018 jyly tartylǵan tikeleı ınvestıtsııa kólemi 2,5 mlrd AQSh dollaryn qurap, 2018 jyly ekijaqty saýda kólemi 3 mlrd. dollarǵa jetti.
EO, Reseı, Italııa, Qytaı, Nıderlandy jáne Frantsııadan keıin Shveıtsarııa Qazaqstannyń altynshy iri saýda áriptesi bolyp tabylady.
Dóńgelek ústel barysynda Qazaqstanda jumys isteıtin Shveıtsarııalyq kompanııalar is-shara qatysýshylaryna ózderiniń oń tájirıbesimen bólisti.
Qazaqstandyq delegatsııa jumys sapary barysynda ınvestıtsııalyq yntymaqtastyqty talqylaý maqsatymen Swissport International Ltd., Burkhard Compression jáne Stadler Rail CIS (Shtadler TMD) kompanııalary ókilderimen kezdesýler ótkizdi.
