CyberShield-2026: Qazaqstannyń úzdik IT stýdentteri anyqtaldy
PETROPAVL. KAZINFORM — Petropavlda CyberShield-2026 respýblıkalyq hakatonyna qatysqan bolashaq IT mamandar jasandy ıntellekt pen kıberqaýipsizdik baǵytynda óz jobalaryn qorǵady.
Aýqymdy is-shara Qozybaev ýnıversıtetinde jáne Soltústik Qazaqstan oblysy boıynsha Ekonomıkalyq tergeý departamentiniń uıymdastyrýymen ótti.
Hakatonǵa elimizdiń 13 joǵary oqý ornynan kelgen komandalar qatysyp, jalpy júlde qory — 4 mln teńgeni sarapqa saldy. Іs-sharanyń negizgi maqsaty — IT, mobıldi tehnologııalar, aqparattyq qaýipsizdik jáne jasandy ıntellekt salalarynda stýdentterdiń áleýetin aıqyndaý.
Hakaton aıasynda qatysýshylar eki baǵyt — «Agroanalıtıkadaǵy AI» jáne «Krıptoqaýipterge qarsy AI» boıynsha jumys istedi. Stýdentter aýyl sharýashylyǵyn damytýǵa arnalǵan tsıfrlyq sheshimder men krıptovalıýta salasyndaǵy táýekelderdi anyqtaıtyn tehnologııalardy usyndy. Olar óz jobalaryn sarapshylarǵa tanystyryp, praktıkalyq mańyzyn kórsetti.
— Búgin ýnıversıtetimiz elimizdiń jetekshi joǵary oqý oryndarynyń ondaǵan komandasynyń basyn qosty. Zamanaýı tehnologııalyq mindetterdi sheshýge 160-tan astam daryndy jas qatysyp otyr. Qazirgi tańda tsıfrlandyrý tek protsesterdi avtomattandyrý ǵana emes, eldiń ulttyq qaýipsizdigi men ekonomıkalyq damýynyń negizi bolmaq. Ýnıversıtetimiz jasandy ıntellekt salasyndaǵy memlekettik saıasatty belsendi qoldaıdy. Bul baǵdarlama stýdentterdiń ıdeıalaryn naqty prototıpterge aınaldyrýǵa múmkindik beredi, — dedi Qozybaev ýnıversıtetiniń rektory Erbol Isaqaev.
Hakaton qorytyndysy boıynsha jeńimpazdar ár baǵyt boıynsha 1 mln teńgeden ıelense, ekinshi jáne úshinshi oryndarǵa 500 myń jáne 300 myń teńgeden tabystaldy.
«Krıptoqaýipterge qarsy AI» baǵyty boıynsha Qozybaev ýnıversıtetiniń «Kings of Taiynsha» komandasy jeńiske jetti. Olar usynǵan CRYPTOGUARD AI jobasy krıptovalıýta jelilerindegi kúdikti operatsııalardy anyqtaýǵa arnalǵan.
Al «Agroanalıtıkadaǵy AI» baǵyty boıynsha birinshi oryndy Almatydaǵy QBTÝ-dyń «Open to Work» komandasy ıelendi.
Sonymen qatar, eń kreatıvti tsıfrlyq sheshim úshin 400 myń teńge kólemindegi arnaıy júlde Qozybaev ýnıversıtetiniń «67» komandasyna berildi.
Uıymdastyrýshylardyń aıtýynsha, mundaı jobalar stýdentterdiń kásibı daǵdylaryn damytyp qana qoımaı, eldiń tsıfrlyq transformatsııasyna úles qosatyn básekege qabiletti mamandardy daıarlaýǵa múmkindik beredi.
Buǵan deıin bıyl mektep oqýshylary arasynda JI boıynsha halyqaralyq olımpıada Qazaqstanda alǵash ret ótetinin jazǵan edik.