Cyber Challenge Kazakhstan: Qazaqstanda alǵash ret kıberqaýipsizdik týrnıri ótip jatyr
ASTANA. KAZINFORM — 12-13 jeltoqsanda QR Memlekettik kúzet qyzmetiniń uıymdastyrýymen Cyber Challenge Kazakhstan forýmy ótedi. Forýmda kıberqaýipsizdik máseleleri talqylanatyn pikirtalas alańy jáne kúshtik qurylymdar arasyndaǵy kıbertýrnır uıymdastyrylady.
Forýmnyń ashylýynda Memlekettik kúzet qyzmeti bastyǵynyń orynbasary Konstantın Kantserov Qazaqstan kıberqaýipsizdigi — ulttyq qaýipsizdiktiń ajyramas bóligi ekenin eske saldy.
Memleket basshysy óz Joldaýlarynda elimizdiń aqparattyq qaýipsizdigin kúsheıtýdiń, tsıfrlyq ınfraqurylymdardy qorǵaýdyń jáne jasandy ıntellektini qaýipsiz ári tıimdi damytýdyń strategııalyq mańyzyn erekshe aıtyp keledi.
— Cyber Challenge Kazakhstan — kúshtik qurylymdar men memlekettik organdar komandalaryn biriktiretin jańa formattaǵy jarystyń ashylýymen sizderdi quttyqtaımyn. Mundaı shara alǵash ret ótýde jáne ol ulttyq kıberqaýipsizdik júıesin damytýdyń mańyzdy bóligine aınaldy. Prezıdent tapsyrmasymen elimizde kıberoqý ortalyqtaryn qurý, kıberáskerlerdi qalyptastyrý, kadrlardy daıarlaý jáne tsıfrlyq qaýipterge qarsy mehanızmderdi jetildirý damyp keledi. Biz bul baǵytta alǵa basyp, tsıfrlyq keńistikti qorǵaýdyń tutas arhıtektýrasyn jasap kelemiz, — dedi K. Kantserov Astana qalasyndaǵy Prezıdenttik ortalyqta.
Búgingi týrnırdiń ótkizilýi — osy joldaǵy qısyndy qadamdardyń biri. Cyber Challenge Kazakhstan — jaı ǵana jarys emes, kúshtik qurylymdardyń úzdik mamandarynyń naqty syn-qaterlerge daıyndyǵyn kórsetetin, jańa sheshimder shyǵatyn, kásibı sheberlik shyńdalatyn jáne vedomstvolar arasyndaǵy ózara is-qımyl nyǵaıtylatyn alań.
— Mundaı bastamalar myqty kásibı qaýymdastyq qalyptastyrýdyń negizine aınalady dep senemiz. Olar eldiń kıberegemendigin nyǵaıtýǵa úles qosa alatyn jańa talanttardy anyqtaýǵa múmkindik beredi. Alǵashqy Cyber Challenge Kazakhstan Memleket basshysy belgilegen strategııalyq mindetterdi iske asyrýdaǵy mańyzdy qadamdardyń biri ári bolashaq dástúrdiń bastaýy bolsyn, — dedi K. Kantserov.
«Kıberqaýipsizdik — bizdiń qorǵanys shebimiz» uranymen ótetin týrnır kúshtik qurylymdardyń kıberqaýipsizdik salasy qyzmetkerleriniń kásibı daıarlyǵyn arttyrýǵa, komandalyq ózara árekettestikti nyǵaıtýǵa jáne aqparattyq keńistiktegi keleńsizdikterge ázir bolýǵa baǵyttalǵan.
Týrnırde komandalar qala ınfraqurylymyna jasalatyn kıbershabýyldardy sheshýge tyrysady. Sondaı-aq, ekinshi kezeńde olar qarjy sektorynyń kúrdeli qaýipterine qarsy turýy qajet, onyń ishinde banktiń AI júıesine jasalatyn prompt injection shabýyldary, derekterdiń urlanýy jáne seriktestik jeli arqyly jasalatyn shabýyldar bar.
Úshinshi kezeńde qatysýshylar kúshtik ınfraqurylymǵa tónetin qaýiptermen jumys isteıdi: qujattardyń taralyp ketýi, beınebaqylaýdy almastyrý, SKÝD júıesin buzý, shabýyldaýshylardyń jelige ornyǵyp alýy sekildi sıtýatsııalar beriledi. Munyń barlyǵy Cyber Labs komandasy ázirlegen Interactive Range vırtýaldy aımaǵynda ótedi.
Jarysqa QR Memlekettik kúzet qyzmeti, QR Ulttyq qaýipsizdik komıteti, QR Qorǵanys mınıstrligi, QR Іshki ister mınıstrligi, QR Ulttyq ulany, Memlekettik tehnıkalyq qyzmet ókilderinen quralǵan 10 komanda qatysady.
Eske sala keteıik, Qazaqstan Birikken Ulttar Uıymynyń kıberqylmysqa qarsy kúreske baǵyttalǵan konventsııasyn ratıfıkatsııalaýǵa nıetti.