Cý tasqyny. ShQO-da jasandy ıntellektti qoldanatyn jedel shtab quryldy
ÓSKEMEN. KAZINFORM — Shyǵys Qazaqstan oblysynda sý tasqynynyń aldyn alý úshin jasandy ıntellektti qoldanatyn jedel shtab quryldy.
Bıyl Altaı aýdanynda qardyń qalyń jaýǵanyna qaramastan, topyraqtyń qatý deńgeıi byltyrǵydan áldeqaıda tómen. Bul sý tasqyny qaýpin azaıtady. Mamandar sýdyń kedergisiz aǵýyn qamtamasyz etý úshin óńirdegi ózenderde jarylys jumystary júrgizilýi tıis 19 oryndy anyqtady.
— Ár eldi meken men sý basý qaýpi bar aýmaq úshin is-qımyl algorıtmin qurastyrý qajet. Muzdyń qaı jerde paıda bolatynyn, adamdardy qaıda evakýatsııalaý kerektigin, qandaı kúshter men quraldar qajet ekenin, sý basý qaýpi tónip turǵan aýyldar, joldar men kópirlerdiń bar-joǵyn aldyn ala bilý kerek. Ákimder osy suraqtardyń jaýabyn bilip, turǵyndarmen jeke aýlalardy qardan tazartý týraly túsindirý jumystaryn júrgizý qajet. Sondaı-aq olarǵa kómektesken jón, — dedi ShQO ákimi Ermek Kósherbaev.
1 aqpannan bastap oblysta jasandy ıntellektti qoldanatyn jedel shtab quryldy. Olar gıdro jáne meteoqyzmet derekteri men ótken jyldardaǵy aqparattardyń negizinde túrli oqıǵalar jelisin boljaıtyn bolady.
Eske salsaq, osyǵan deıin ShQO-da apatty jaǵdaıdaǵy Orta Terekti sý qoımasynda sý tasqyny kezeńinde mamandar kezekshilik etetindigi habarlanǵan.