«CUNIT» tennıs akademııasynyń jattyqtyrýshylary qazaqstandyq balalardy sheberlikke baýlydy (FOTO)
ASTANA. QazAqparat - Qazaqstan Respýblıkasynyń Ulttyq tennıs ortalyǵynyń qoldaýymen 22-25 tamyz aralyǵynda Astanada aımaq-aımaqtan kelgen 20 shaqty bala «CUNIT» halyqaralyq tennıs akademııasynyń mamandarynan dáris alǵan.
Ispanııanyń tennısten joǵary bilikti jattyqtyrýshysy, «CUNIT» akademııasynyń prezıdenti Fabıo Mýggı bastaǵan taǵy eki jattyqtyrýshy qazaq balalaryna ózderiniń jeke júıeleri boıynsha tennıs oınaýdy úıretken. Ulttyq tennıs ortalyǵynyń baspasóz hatshysy Janar Tileýquldyń aıtýynsha, ortalyq Astana, Kókshetaý, Aqtaý, Óskemen, Aqtaý qalalarynan balalardy iriktep alǵan. Al, sheteldik myqty mamandardyń dárisine qajetti qarjyny ata-analary ózderi tólegen.
"Fabıo Maggı óz tennıs akademııasyn 15 jyl buryn ashqan. Ózi uzaq jyldar boıy tennıs oınaǵan eken. Balalarymyzǵa erekshe jattyǵýlar, jalpy, óte kóp dúnıe úıretti. Sebebi, maman úlken tennıstiń qyr-syryn ábden meńgergen ári onyń avtorlyq kýrsy bar", - deıdi ata-analar.
Al, F.Maggıdiń aıtýynsha, qazaq balalary onyń avtorlyq kýrsyn tez ıgerip alǵan. "Balalardyń qabileti jaqsy, tek olar buryn tennıstiń osyndaı jattyǵýlaryn kórmegen, bilmegen. Árıne, jattyǵý úshin bir apta azdyq etedi, biraq, bir aptanyń ózi olardyń kózqarastaryn, daıyndyq deńgeılerin ózgertti. Men olardy kúnine alty saǵattan daıyndadym, sonda da sharshamaıdy", - deıdi ıspandyq tennısshi.
