Tsýkerberg Facebook arqyly kisi óltirý translıatsııalaryn boldyrmaýǵa ýáde etti
ASTANA. QazAqparat -Facebook-tiń negizin qalaýshy Mark Tsýkerberg atalmysh áleýmettik jeli Ogaıoda qart adamdy óltirý syndy jantúrshigerlik qylmystardyń nasıhattalýy úshin qoldanylmaýyna kúsh salatynyn ýáde etti, dep habarlaıdy QazAqparat «RIA Novostı» agenttigine silteme jasap.
Ótken jeksenbide áleýmettik jelini paıdalanýshy Stıv Stıvens 74 jastaǵy qarııany atyp óltirgen bolatyn. Stıvens qylmysyn jasaý barysynda Facebook-tiń tikeleı efırine qosylǵan jáne buǵan deıin de birneshe adamdy óltirgenin aıtqan. Biraq bul málimdemeleriniń naqtylyǵy áli anyqtalmady. Keıin belgili bolǵandaı, Pensılvanııa shtatynda polıtseılerden qashpaq bolǵan Stıvens, óz-ózine qol salǵan.
"Biz mundaı qaıǵyly oqıǵalardy boldyrmaý úshin qoldan kelgenniń barlyǵyn jasaımyz», - dep málimdegen Tsýkerberg qaza bolǵan Klıvlend turǵyny Robert Gadvınniń týystary men jaqyndaryna kóńil aıtty. Ol «kompanııa aldynda qyrýar jumys turǵanyn» qosyp ótti.
