Cý únemdeý tehnologııalaryn engizýdi sýbsıdııalaýǵa bólinetin qarjy 214,6 mlrd teńgege jetti
ASTANA. KAZINFORM — Memleket basshysynyń aýyl sharýashylyǵynda sý únemdeý tehnologııalaryn engizýdi yntalandyrý jónindegi tapsyrmasyn oryndaý maqsatynda 2026-2028 jyldarǵa arnalǵan respýblıkalyq bıýdjette 214,6 mlrd teńge qarastyrylǵan. Bul aldyńǵy úsh jylmen salystyrǵanda tórt ese kóp. Aýyl sharýashylyǵy taýaryn óndirýshilerge sý jetkizý qyzmetteriniń qunyn sýbsıdııalaýǵa 13,5 mlrd teńge bólindi.
Bul shara sharýalardyń jańbyrlatyp jáne tamshylatyp sýarý júıelerine aıtarlyqtaı qarjy shyǵynynsyz kóshýine múmkindik berýge, sondaı-aq sý únemdeý tehnologııalaryn engizýge nıetti aýyl sharýashylyǵy taýaryn óndirýshilerdi qamtý aıasyn keńeıtýge baǵyttalǵan.
Eske salaıyq, buǵan deıin Sý resýrstary jáne ırrıgatsııa mınıstrligi sharýalardyń sý únemdeý júıelerin satyp alý jáne ornatý shyǵyndaryn óteý mólsherin 50%-dan 80%-ǵa deıin arttyrǵan bolatyn. Mundaı tehnologııalardy qoldanǵan kezde sýarmaly sýdyń sýbsıdııasy 85%-ǵa deıin ulǵaıtyldy.
Júrgizilgen jumystardyń nátıjesinde Qazaqstanda sý únemdeý tehnologııalary qoldanylatyn jalpy aýmaq 702,3 myń gektarǵa jetti. Bul shamamen 1,1 mlrd tekshe metr sýdy únemdeýge múmkindik berdi.
Sonymen qatar zamanaýı sýarý júıelerin engizý qarqyny da jedeldedi. 2024 jylǵa deıin bul kórsetkish jylyna orta eseppen 30 myń gektar bolsa, 2024-2026 jyldary jylyna 150 myń gektardan asty.
Budan bólek, sýarmaly sýdy sýbsıdııalaý qaǵıdalaryna ózgerister engizildi. Atap aıtqanda, lazerlik tegistegish sýbsıdııalanatyn sý únemdeý tehnologııalarynyń tizimine qosyldy.
- Qazaqstan halqyna Joldaýynda Prezıdent aýyl sharýashylyǵynda sýdy tıimdi paıdalanýdyń mańyzdylyǵyn atap ótti. Óıtkeni tutynylatyn sý resýrstarynyń 60%-yna deıingi bóligi osy salaǵa tıesili. Mınıstrligimiz júzege asyryp jatqan keshendi sharalar osy mindetti oryndaýǵa baǵyttalǵan. 2030 jylǵa qaraı sý únemdeý tehnologııalary qoldanylatyn jalpy aýmaqty 1,3 mln gektarǵa jetkizý josparlanyp otyr. Bul jyl saıyn 2,2 mlrd tekshe metrge deıin sý únemdeýge múmkindik beredi dep kútilip otyr, - dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, Qazaqstandaǵy sýarmaly jerdiń 44%-ynda sý únemdeý tehnologııalary qoldanylady.
