Creative Aimaq aıasynda Jetisý oblysynyń kreatorlary 2 mln teńgeniń ónimin satty
ASTANA. KAZINFORM — Astanadaǵy Qazaq Creative Hub alańynda Creative Aimaq respýblıkalyq jobasy aıasynda «Jetisý – Elorda tórinde» jármeńkesi ashyldy.
Іs-shara óńirdiń dástúrli qolónerin, tsıfrlyq tehnologııalaryn, zamanaýı dızaınyn, týrıstik bastamalary men shyǵarmashylyq jobalaryn bir alańǵa toǵystyrdy.
Jármeńkeni Qazaqstan Respýblıkasy Premer-Mınıstriniń orynbasary – Mádenıet jáne aqparat mınıstri Aıda Balaeva aralap kórdi. Jetisý oblysynyń kreatorlary usynǵan jumystarmen tanysqan Úkimet basshysynyń orynbasary kreatıvti ındýstrııalardyń basty mindeti – shyǵarmashylyq ıdeıany suranysqa ıe ónimge aınaldyryp, ekonomıkalyq damýǵa jańa múmkindikter ashý ekenin atap ótti.
Jármeńkeniń alǵashqy kúni kreatıvti ındýstrııalardyń túrli baǵytynda eńbek etetin Jetisý oblysynyń 30-dan astam ókili bas qosty. Olardyń qatarynda sándik-qoldanbaly óner sheberleri, dızaınerler, qolónershiler, tsıfrlyq jobalardy ázirleýshiler men kásipkerler bar.
Jármeńke keńistigi alty taqyryptyq aımaqqa bólingen: Welcome Zone, qolóner zaly, «Ulttyq aspaptar álemi», Nomad Art Hall, Ethno Village jáne ulttyq kıim galereıasy.
Jetisýdyń tsıfrlyq jáne ınnovatsııalyq jobalaryna arnaıy bólim uıymdastyrylǵan. Munda onlaın kýrstardy, testileý júıesin jáne jasandy ıntellekt negizindegi kómekshini qamtıtyn Online Ustaz bilim berý ekojúıesi, sondaı-aq «Táýelsizdik urpaqtary» grantynyń jeńimpazy ázirlegen elektr kóligi jobasy tanystyryldy. Granttyq qoldaýdyń arqasynda joba avtory óndiris aýqymyn keńeıtip, ónimin satýdy jolǵa qoıǵan. Kórmege qoıylǵan elektromototsıklderdiń biri jármeńke barysynda satyp alyndy.
Jármeńkede qolóner zalyna erekshe oryn berilgen. Munda kıizden, aǵash pen bylǵarydan jasalǵan buıymdar, ulttyq zergerlik áshekeıler men kádesyılar usynylǵan. Live Workshop formatynda kelýshiler ulttyq buıymdardyń jasalý úderisimen tanysyp, sheberlerdiń týyndylaryn satyp ala alady.
«Ulttyq aspaptar álemi» aımaǵynda dombyra, qobyz, jetigen, sybyzǵy sekildi dástúrli qazaq mýzykalyq aspaptarynyń biregeı úlgileri jınaqtalǵan. Qonaqtarǵa aspaptardyń tarıhy, jasalý erekshelikteri men ózindik ún-sıpaty týraly málimet berildi.
Baǵdarlama Jetisýdyń jeti ózeni men mádenı murasyna arnalǵan Jetisu Creative beınerolıginiń kórsetilimimen jáne óńir dızaınerleri Janar Kelgembaeva men Zere Esenbaıdyń avtorlyq týyndylary usynylǵan Nomad Style Show sán kórsetilimimen jalǵasty. Kórsetilim aıaqtalǵannan keıin Zere Esenbaı sahnalyq kostıýmderdiń dızaınyn ázirleý jáne tigý jóninde 40 mln teńgelik kelisimshart jasasty.
Sonymen qatar jármeńke qonaqtary qolónershilerdiń sheberlik sabaqtaryna qatysyp, kórmege qoıylǵan ónimderdi satyp aldy. Birinshi kúnniń qorytyndysy boıynsha jalpy quny 2 mln teńgeden asatyn kreatıvti ónim satyldy. Ulttyq oıynshyqtar, bas kıimder, sándik zergerlik buıymdar, beıneleý óneri týyndylary, sondaı-aq Jetisý oblysynda qurastyrylǵan elektr velosıpedteri erekshe suranysqa ıe boldy.
Búgin jármeńke qonaqtaryna teatr qoıylymdary men arnaıy sahnalyq baǵdarlamalar da usynylady. Kórermender Bıken Rımova atyndaǵy akademııalyq drama teatrynyń «Taptym-aý seni» spektaklinen kórinisterdi jáne «Muqaǵalı» monospektaklinen úzindini tamashalaı alady.
Jalpy, Creative Aimaq respýblıkalyq jobasy aıasynda osy ýaqytqa deıin Qazaqstannyń segiz óńiriniń jármeńkesi ótti. Olarǵa 352 kreator qatysyp, kórmelerdi 20 690 adam tamashalady. Satylǵan kreatıvti ónimderdiń jalpy kólemi 42,9 mln teńgeden asty.
QR Mádenıet jáne aqparat mınıstrliginiń qoldaýymen «Kreatıvti ındýstrııalardy damytý qory» korporatıvtik qory júzege asyryp jatqan Creative Aimaq jobasy otandyq brendterdi qoldaýǵa, óńirlerdegi kreatıvti ındýstrııalardy damytýǵa jáne elimizdiń ár aımaǵynyń mádenı ári shyǵarmashylyq áleýetin keńinen tanytýǵa baǵyttalǵan.
Jetisý oblysynyń jármeńkesine búgin 4 100 adam keldi. Іs-shara erteń de jalǵasady.
