Creative Aimaq: Atyraýdyń kreatorlary 15 mln teńgeniń ónimin satty
ASTANA. KAZINFORM — Astanada Creative Aimaq respýblıkalyq jobasy aıasynda uıymdastyrylǵan Atyraý oblysynyń kreatıvti jármeńkesi óz máresine jetti. Eki kúnge sozylǵan shara Qazaq Creative Hub alańynda ótti. Bul týraly Mádenıet jáne aqparat mınıstrliginiń baspasóz qyzmeti habarlady.
Kópshilikke sándik-qoldanbaly óner buıymdary, qoldan jasalǵan zergerlik áshekeıler, aǵashtan, bylǵarydan, súıek pen metaldan jasalǵan zattar, keramıka, óńir dızaınerleriniń kıim toptamalary jáne jergilikti sýretshilerdiń týyndylary usynyldy.
Jármeńkede sheberlik sabaqtary, teatr qoıylymdary jáne JAIYQ.CORP táýelsiz art-keńistiginiń shyǵarmashylyq baǵdarlamasy da uıymdastyryldy.
Eki kún ishinde jármeńkege 10 myń adam baryp, Atyraý oblysynyń kreatorlary jalpy 15 mln teńgeniń ónimin satty.
Creative Aimaq jobasy otandyq kreatıvti ındýstrııa ókilderin qoldaýǵa, jergilikti brendterdi keńinen tanytýǵa jáne shyǵarmashylyq ónimderdi ótkizýge jańa múmkindikter qalyptastyrýdy kózdeıdi.
Joba aıasynda endigi kezekte elordada Batys Qazaqstan oblysynyń kreatıvti jármeńkesi ótedi.
Aıta keteıik, buǵan deıin elordada Qyzylorda oblysynyń kreatıvti ındýstrııalar jármeńkesi ótti.
