Creative Aimaq: Astanada Soltústik Qazaqstan oblysynyń kreatıvti jármeńkesi ótedi
ASTANA. KAZINFORM — Astana kúni qarsańynda, ıaǵnı 4-5 shilde kúnderi elordada respýblıkalyq Creative Aimaq jobasy aıasynda «Botaı — Uly dala mádenıeti» atty kreatıvti jármeńke uıymdastyrylady, dep habarlaıdy Astana ákimdiginiń resmı saıty.
— Іs-shara Creative Aimaq respýblıkalyq jobasy aıasynda Qazaq Creative Hub alańynda ótedi. Jobany «Kreatıvti ındýstrııalardy damytý qory» korporatıvtik qory oryndaıdy. Bul joly joba aıasynda Soltústik Qazaqstan oblysynyń North Kazakhstan Heritage Weekend atty «Botaı — Uly dala mádenıeti» jármeńkesi ótkiziledi. Dál osy Soltústik Qazaqstan oblysynyń aýmaǵynda adamzat órkenıetiniń mańyzdy kezeńderiniń biri — jylqyny alǵash qolǵa úıretýmen baılanysty Botaı mádenıeti qalyptasty. Búginde óńir tarıhı-mádenı murany kreatıvti ekonomıkamen, tsıfrlyq tehnologııalarmen jáne adamı kapıtaldy damytýmen ushtastyryp, jańashyldyq dástúrin jalǵastyryp keledi, — deıdi uıymdastyrýshylar.
Kórme úsh taqyryptyq aımaqtan turady:
Birinshi aımaq tarıhı-mádenı muraǵa arnalady. Kelýshiler Botaı mádenıetimen, arheologııalyq jańalyqtarmen, qazaq halqynyń dástúrlerimen, ulttyq qolónermen, sándik-qoldanbaly ónermen jáne Abylaı han tarıhymen tanysa alady. Munda kórkem sımpozıým aıasynda salynǵan kartınalar, mýltımedıalyq elementteri bar Botaı mádenıetiniń ınteraktıvti kórmesi, «Abylaı han rezıdentsııasy» teatrlandyrylǵan ekspozıtsııasy, qysh sheberhanasy, dástúrli kilem toqý óneriniń kórsetilimi, sondaı-aq avtorlyq keramıka men halyq sheberleriniń buıymdary usynylady.
Ekinshi taqyryptyq alań Soltústik Qazaqstan oblysynyń kreatıvti ekonomıkasyna arnalady. Munda óńirdiń úzdik brendteri, ulttyq naqyshtaǵy zamanaýı dızaınerlik kıim toptamalary, avtorlyq áshekeıler, kádesyılar, qolónershilerdiń buıymdary, sándik-qoldanbaly óner týyndylary jáne ulttyq mádenıettiń zamanaýı úlgileri tanystyrylady. Kelýshilerdi dızaınerlik etno-kórsetilim, jergilikti óndirýshiler ónimderiniń jármeńkesi, jandy etno-mýzyka jáne óńirdiń jetekshi sheberleriniń sheberlik sabaqtary kútedi.
Úshinshi keńistik tehnologııalar men medıaǵa arnalǵan. «Tsıfrlyq kıiz úı» aımaǵynda aqparattyq tehnologııalar, jasandy ıntellekt, robototehnıka, GameDev, VR/AR, 3D-baspa jáne tsıfrlyq shyǵarmashylyq salalaryndaǵy jobalar usynylady. Kelýshiler óńirdiń ınnovatsııalyq ekojúıesimen tanysyp, SKO Hub uıymdastyratyn ınteraktıvti kvestke qatysyp, drondar men zamanaýı tehnologııalyq sheshimderdiń kórsetilimin tamashalaı alady.
Sondaı-aq kıno, anımatsııa jáne medıaóndiriske arnalǵan arnaıy alań jumys isteıdi. Onda Soltústik Qazaqstan oblysynyń avtorlary túsirgen derekti, anımatsııalyq jáne qysqametrajdy fılmder kórsetiledi.
Baǵdarlama etno-kontsertpen, jandy mýzykamen jáne óńirlik brendter men halyq sheberleriniń ónimderi qoıylǵan kórme-jármeńkemen qorytyndylanady.
Eki kún boıy saǵat 10:00–den 19:00–ge deıin kelýshiler úshin ınteraktıvti kórme alańdary, óńirlik brendterdiń jármeńkesi, qolónershiler buıymdarynyń kórme-satylymy, sheberlik sabaqtary, mýltımedıalyq ekspozıtsııalar men taqyryptyq ınstallıatsııalar jumys isteıdi.
Budan buryn habarlanǵandaı, Astanada Dombyra kúnine oraı mýltımedıalyq shoý ótedi.
