COVID-tiń jańa shtamy: Densaýlyq saqtaý mınıstrligi málimdeme jasady

ASTANA. KAZINFORM — Dúnıejúzilik densaýlyq saqtaý uıymynyń (DDU) málimetinshe, sáýir men mamyr aılary aralyǵynda álem boıynsha 23 164 rastalǵan jaǵdaı tirkelgen. Álemde Omıkronnyń LP.8.1, JN.1, NB.1.8.1 jáne basqa da nusqalary aınalymda bolýy jalǵasyp otyr. 

Sanıtarııalyq-epıdemıologııalyq baqylaý komıtetiniń málimetinshe elde koronavırýs ınfektsııasy boıynsha epıdemıologııalyq jaǵdaı turaqty.

Densaýlyq saqtaý mınıstrligi eldegi syrqattanýshylyq pen álemdegi epıdemıologııalyq jaǵdaıǵa apta saıynǵy monıtorıng júrgizýdi jalǵastyryp otyr.

— Jyl basynan beri COVID-19-dyń 362 jaǵdaıy tirkeldi. Ótken jyldyń osyndaı kezeńimen salystyrǵanda syrqattanýshylyq deńgeıi 3,4 esege tómendegen, ólim jaǵdaıy tirkelgen joq. Aýrý jeńil túrde ótip jatyr, patsıentter ambýlatorııalyq jaǵdaıda em qabyldanyp jatyr, — delingen habarlamada.

Qazaqstanda vırýstyń aınalymy men onyń ártúrli nusqalaryna toqsan saıyn monıtorıng júrgiziledi.

— Júrgizilgen zerthanalyq baqylaý nátıjeleri boıynsha bıylǵy jyly Qazaqstanda anyqtalǵan barlyq 100% jaǵdaılarda Omıkron nusqasy aınalymda boldy. Atap aıtqanda, JN.1 qosalqy túri jáne onyń LF.7.1.3, LP.8.1, LF.7.6 jáne KP.3.1.1 tarmaqtary anyqtalǵan. Dúnıejúzilik densaýlyq saqtaý uıymynyń (DDU) málimetinshe, sáýir men mamyr aılary aralyǵynda álem boıynsha 23 164 rastalǵan jaǵdaı tirkelgen. Álemde Omıkronnyń LP.8.1, JN.1, NB.1.8.1 jáne basqa da nusqalary aınalymda bolýy jalǵasyp otyr, — delingen mınıstrlik habarlamasynda. 

Aıta ketelik densaýlyq saqtaý protsesterin tsıfrlandyratyn aqparattyq júıe qurylatyny týraly habarlaǵan edik.