COVID-2019: Qazaqstanda úsh myń ekspress-test alyndy

NUR-SULTAN. QazAqparat – Almaty men Nur-Sultan qalalarynda úsh myń ekspress-test alyndy. Bul týraly OKQ-da onlaın rejımde ótken baspasóz máslıhatynda QR DSM Taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraǵasy Lıýdmıla Bıýrabekova málim etti, dep habarlaıdy QazAqparat tilshisi.

«Koronavırýs boıynsha ekspress-test Almaty men Nur-Sultan qalalarynda júrgizilip jatyr. Sonymen qatar shekaralardaǵy sanıtarlyq-ótkizý pýnkteriniń bári de ekspress-testpen qamtamasyz etilgen. Ol jerde kirgenderdiń bárine ekspress-test júrgiziledi. Odan bólek bizdiń metsenattardyń qarajatymen 270 myń test satyp alynǵan bolatyn», - dedi Lıýdmıla Bıýrabekova.

Komıtet tóraǵasynyń aıtýyna qaraǵanda, Densaýlyq saqtaý mınıstrligi ekspress-testten ótýi tıis azamattardyń sanatyn aıqyndap, bekitip qoıǵan.

«Búgingi kúni 3 136 ekspres-test júrgizildi. Onyń 354-i Qazaqstannyń avtokólik beketterinde, 2782-i medıtsınalyq uıymdarda jasaldy. 64 adamda antıdeneniń bary anyqtaldy. ıAǵnı, olardyń bári koronavırýs ınfektsııasymen aýyryp, jazylyp ketkender. Olardy endi ary qaraı bekitilgen algorıtm boıynsha PTR-testten ótkizemiz», - deıdi ol.

Eske sala ketsek, «Olımp» klınıkalyq-dıagnostıkalyq zerthanalary 13 sáýirden bastap Nur-Sultan men Almaty qalalarynda koronavırýs boıynsha tegin testen ótýge bolatynyn jarııa etken bolatyn.