COVID-19 juqtyrýy múmkin avtobýs jolaýshylary Túrkistan blokbeketinde anyqtalǵan
TÚRKІSTAN. QazAqparat - COVID-19 pandemııasynyń aldyn alý maqsatynda Túrkistan oblysynyń ákimi Ómirzaq Shókeev keshendi qaýipsizdik sharalaryn qabyldady. Solardyń biri retinde 18 naýryzdan bastap Almaty jáne Qyzylorda baǵytyndaǵy shekaralyq aımaqtarda ornalasqan «Saýran» jáne «Shaqpaq» pýnkterinde táýlik boıǵy blokbeketter qoıyldy, dep habarlaıdy QazAqparat.
Bul beketterde polıtsııa jáne medıtsına mamandary árbir kólikti toqtatyp, arnaıy qurylǵymen azamattardyń dene qyzýlaryn ólshep, tekseristen ótkizýde.
«Atalǵan blokbeketterdiń júıeli jumysynyń arqasynda Shymkent-Nur-Sultan baǵytyndaǵy (memlekettik tirkeý nómiri - kz 646 FNB, 13-óńir) avtobýsta koronavırýs juqtyrǵan azamatpen birge kelgen 56 adamnyń naqty deregi anyqtalyp otyr. Kóliktegi jolaýshylar týraly tolyq aqparatty Túrkistan oblysy Túlkibas aýdanyndaǵy Shaqpaq beketiniń qyzmetkerleri 20 naýryz kúni jazyp alǵan. Qazirgi kezde atalǵan azamattar oqshaýlanýǵa alyndy. Aldaǵy ýaqytta oblys turǵyndaryn saqtyq sharalaryn kúsheıtip, salǵyrttyq tanytpaýǵa shaqyramyz», - dedi óńir ákimdiginen.
Jalpy, 18 naýryzdan bastap saqtyq maqsatynda Túrkistan oblysynyń shekaralyq ýchaskelerine 35 blokbeket qoıylǵan. Onyń ishinde 31-i eldi mekenderde, al 4-i temirjol vokzaly men stantsııalarda ornalasqan. Atalǵan beketterde búginde 37 medıtsınalyq, polıtsııa qyzmetkerleri jumys isteýde.
Qazirgi tańda blokbeketterde polıtsııa men medıtsına qyzmetkerleri kúsheıtilgen jumys rejımine kóshken.
