COVID-19 juqtyrǵan medıtsına mamandaryna tólemaqy qalaı beriledi
«Koronavırýs ınfektsııasyn juqtyrǵan medıtsınalyq mamandarǵa tólemaqy taǵaıyndaý boıynsha Densaýlyq saqtaý mınıstrligi men Eńbek jáne halyqty áleýmettik qorǵaý mınıstrligi birlesken buıryq shyǵardy. Onda koronavırýspen kúreske tikeleı qatysqan mamandarǵa tólemaqy berý algorıtmi jazylǵan. Basty negizdeme - mamannyń aýrý juqtyrý faktisin habarlaý», - dedi vıtse-mınıstr Ortalyq kommýnıkatsııalar qyzmetinde ótken brıfıngide.
Habarlaýdan keıin ınfektsııalyq aýrý oshaǵyn anyqtaý úshin epıdemıologııalyq tekserý júrgiziledi.
«Tekserý nátıjesi arnaıy komıssııaǵa jiberiledi. Bul komıssııa quramyna eńbek ınspektsııasy ókilderi, jumys berýshi ókili, sanıtarlyq-epıdemıologııalyq uıym ókilderi jáne qyzmetkerdiń nemese kásipodaq uıymynyń ókilderi kiredi. Atalǵan buıryq kúshine endi jáne jaqyn arada jumysyn bastaıdy», - dedi L. Aqtaeva.
Vıtse-mınıstrdiń aıtýynsha, qazirgi ýaqytta Qazaqstannyń 13 óńirinde 370 medıtsınalyq qyzmetker COVID-19 juqtyrǵan. Olardyń 28 paıyzy - dárigerler, 48 paıyzy - medbıkeler jáne 23 paıyzy - kishi medıtsınalyq qyzmetkerler.
Eske sala ketsek, naýryz aıynyń sońynda TJ rejımin qamtamasyz etý jónindegi Memlekettik komıssııa epıdemııaǵa qarsy sharalarǵa atsalysqan medıtsınalyq qyzmetkerlerge ústemeaqy taǵaıyndady.
Qaýiptiligi boıynsha birinshi top mamandarynyń jalaqysyna aıyna 850 myń teńge ústemeaqy qosylady. Ekinshi top - provızorlyq statsıonar men jedel járdem qyzmetteriniń dárigerleri, orta jáne kishi medıtsına qyzmetkerleri. Olardyń ústemeaqysy aıyna 425 myń teńgeni quraıdy. Úshinshi topqa karantındik statsıonar dárigerleri, orta jáne kishi medıtsına qyzmetkerleri, sanıtarlyq dárigerler, jedel járdem júrgizýshileri jáne taǵy basqalary kiredi. Olar aıyna 212 myń teńge ústemeaqy alady.