COVID-19 vırýsynan eki mln adam qaıtys boldy: BUU basshysy málimdeme jasady
«Osy eki mıllıon adamnyń ómirin eske ala otyryp, álem kúsh jumyldyrýy kerek», – dedi BUU basshysy. Ony vaktsınalardyń aınalasynda paıda bolǵan «vakýým» mazalaıdy. Gýterrıshtiń aıtýynsha, tabysy joǵary memleketter vaktsınalarǵa tez qol jetkizse, álemdegi eń kedeı elderde kerisinshe oryn alyp otyr. Keıbir memleketter astyrtyn kelisim jasap, vaktsınalardy artyǵymen satyp alýda.
«Vaktsına óndirýshiler jaýapkershilikti sezinip, COVAX mehanızmimen jáne búkil álemdegi eldermen birlesip, vaktsınalardy qajetti mólsherde jetkizip, durys taratý úshin jumys isteýi kerek», – dedi Bas hatshy. – Elder vaktsınalardyń artyq mólsherin bólisýge mindetteme alýy tıis».
Osylar oryndalǵannan keıin ǵana álemdegi medıtsına qyzmetkerlerin tez arada vaktsınatsııalaýǵa jáne densaýlyq saqtaý júıelerin saqtap qalýǵa bolatyndyǵyn aıtty ol. Sodan keıin baryp basqa da qater tobyndaǵylardy vaktsınatsııalaýdy jalǵastyrýǵa bolady.
Antonıý Gýterrısh halyqty vaktsınalar týraly habardar etýdiń jáne adamdarda paıda bolǵan senimsizdikti joıý qajettiligin atap ótti. BUU basshysy ǵalymdar men dárigerler óz jumystaryn júrgizip jatqanda, bárimiz de úles qosýymyz kerek ekenin eske saldy: «Bir-birimizdi qorǵaý úshin qarapaıym jáne dáleldengen nárselerdi este saqtaıyq: maska taǵý, fızıkalyq qashyqtyqty saqtaý jáne kópshilikten aýlaq bolý. Bizdiń álem bul vırýsty birlesip áreket etkende ǵana jeńe alady», – dep qorytyndylady Bas hatshy.
