COVID-19 vırýsyna shaldyqqandar sany ósti - Dúnıejúzilik densaýlyq saqtaý uıymy álemde
ASTANA. KAZINFORM - 11 jeltoqsan men 7 qańtar aralyǵynda álemde koronavırýs ınfektsııasyn juqtyrý kórsetkishi aldyńǵy tórt aptamen salystyrǵanda 4%-ǵa ósti, bul rette naýqastardyń eń kóp sany Reseıde anyqtalǵan – 225 198. Sonymen birge, álemde ólim-jitim orta eseppen 26%-ǵa tómendedi, delingen Dúnıejúzilik densaýlyq saqtaý uıymynyń (DDU) habarlasynda, dep habarlaıdy TASS aqparat agenttigi.
DDU málimetinshe, tórt apta ishinde álemde vırýs juqtyrýdyń 1 113 726 jaǵdaıy jáne odan bolǵan 8 700 ólim sany tirkeldi. Aýrýhanaǵa jatqyzylǵandar sany 40 paıyzǵa ósip, 28 kúnde 173 myńnan asty, jansaqtaý bólimshelerine túsken naýqastar sany 13 paıyzǵa (barlyǵy 1,9 myńǵa jýyq) ósti. Vırýstyń álemde eń kóp taralǵan shtamy – JN.1.
DDU derekteri aımaqtarda aýrýǵa shaldyǵý jáne ólim-jitimniń árkelki kórinisin kórsetip otyr. Ońtústik-Shyǵys Azııada kovıd juqtyrý jaǵdaılarynyń sany tórt aptada 379%-ǵa, al ólim-jitim bes eseden astamǵa ósti.
Batys Tynyq muhıty aımaǵynda aýrýǵa shaldyqqandar sany 77%-ǵa kóp bolsa, ólim-jitim 45%-ǵa azaıdy.
Eýropada qaýipti vırýs juqtyrý kórsetkishi 13%-ǵa, al ólim-jitim 3%-ǵa tómendedi.
Amerıka aımaǵynda aýrýǵa shaldyǵý kórsetkishi 18%-ǵa, ólim sany 41%-ǵa tómendedi.
Shyǵys Jerorta teńizinde 13%-ǵa az adam aýyryp, odan qaıtys bolǵandar sany 53%-ǵa azaıdy.
Reseı Federatsııasynan basqa, koronavırýs juqtyrýdyń jańa jaǵdaılary eń kóp tirkelgen bes eldiń qataryna Sıngapýr (174 643), Italııa (163 599), Grekııa (68 590) jáne Malaızııa (67 206) kiredi. Vırýstan bolǵan eń kóp ólim sany Italııada tirkeldi – 1016. Odan keıingi orynda Reseı (679), Polsha (543), Shvetsııa (446) jáne Grekııa (322) tur.
