COVID-19: Úı karantınine qandaı talap qoıylady
Vıtse-mınıstrdiń Facebook paraqshasyndaǵy jazbasyna sáıkes, sımptomsyz vırýs tasymaldaýshylyq kezinde patsıentti oqshaýlaý jaǵdaıy týyndaǵanda ambýlatorııalyq jaǵdaılarda medıtsınalyq baqylaýǵa jáne úıde oqshaýlaýǵa (úı karantıni) jatady. Bul rette úı karantınin uıymdastyrý úshin turý jaǵdaılaryna birqatar talap qoıylady.
Birinshiden, baılanysta bolǵan adam kórshilerden (basqa otbasy múshelerinen) oqshaýlana alatyn jeke páter (jeke dárethanasy bar jeke bólme) bolýy kerek.
Ekinshiden, baılanysta bolǵan adam jáne otbasynyń/úı sharýashylyǵynyń basqa músheleri jeke qorǵanysh quraldaryna (medıtsınalyq maskalar, qolǵaptar) qol jetkize alýy jáne saqtyq sharalaryn (qoldy sabynmen jıi jýý, ylǵaldy jınaý júrgizý, úı-jaıdy jeldetý) saqtaýǵa qabiletti bolýy tıis.
Úshinshiden, úı sharýashylyǵynda COVID-19 ınfektsııasynan keıin asqyný qaýpi joǵary (65 jastan asqan adamdar, 5 jasqa deıingi balalar, júkti áıelder, ımmýnıteti álsiz nemese júrektiń, ókpeniń nemese búırektiń sozylmaly aýrýlary bar adamdar) adamdar joq bolýy qajet.
Tórtinshiden, statsıonarlyq telefony nemese uıaly baılanysqa qoljetimdiligi bolýy shart.
Besinshiden, úı karantınin saqtaý jaǵdaılaryn mindetti oryndaý týraly qol qoıylǵan qolhat beriledi.
Altynshydan, adam úı karantıni rejımin saqtaý jóninde ózine mindetteme alady jáne qolhatta jeke qol qoıýymen rastaıdy. Úı karantıni rejımin buzǵan adamdar ákimshilik jaýapkershilikke tartylady. Atalǵan talaptardy saqtaý múmkin bolmaǵan jaǵdaıda karantın karantındik statsıonarda júzege asyrylady.
«Úıde oqshaýlaý úshin jaǵdaılar bolmaǵan kezde emdeýge jatqyzý týraly sheshimdi medıtsınalyq-sanıtarlyq kómek mamany árbir jaǵdaıda Taýarlar men kórsetiletin qyzmetterdiń sapasy men qaýipsizdigin baqylaý komıteti aýmaqtyq bólimshesiniń epıdemıologymen kelisim boıynsha jeke qabyldaıdy», - dedi Lıýdmıla Bıýrabekova.
Onyń atap ótýinshe, úı karantınindegi adam úıden shyqpaýy, páterde otbasynyń basqa músheleri turatyn jaǵdaıda esigi jabylatyn, jaqsy jeldetiletin jeke bólmede bolýy qajet. Tek qajetti sharalar úshin jáne qysqa ýaqytqa ǵana bólmeden shyǵýǵa ruqsat etiledi. Bul rette aýyz ben muryn medıtsınalyq maskamen jabylýy tıis. Vırýstyń taralýyn boldyrmaý úshin túshkirgende nemese jótelgende aýyz ben muryndy bir ret qoldanylatyn qol oramalymen japqan durys. Osydan keıin qoldy sabynmen jýý nemese ony spırt negizindegi antıseptıkpen óńdeý qajet. Tamaqtaný aldynda, sondaı-aq dárethanaǵa barǵannan keıin qoldy sabynmen jýý nemese spırt negizindegi antıseptıkpen óńdeý kerek. Qoldy súrtý úshin bir ret qoldanylatyn sýlyqtardy paıdalanǵan durys. Múmkindiginshe jeke dárethanany paıdalaný qajet. Temperatýra nemese álsizdený belgileri paıda bolǵan kezde karantın týraly habarlap jáne júginý sebebin kórsete otyryp, COVID-19 boıynsha koll-ortalyqqa júginý nemese jedel járdemge qońyraý shalý kerek.