Covid-19: Túrkistan oblysynda 15 myńǵa jýyq adamǵa ekpe egildi
NUR-SULTAN. QazAqparat - Túrkistan oblysynda 15000 myńǵa jýyq adamǵa «Covid-19» indetine qarsy ekpeniń 1-komponenti egildi. Onyń ishinde 12 myńǵa jýyq medıtsınalyq qyzmetker bolsa, 2 myńǵa jýyq muǵalimder men 500-ge jýyq polıtsııa qyzmetkerleri bar. Óńirde búgingi tańda ekinshi komponentpen 8103 adam vaktsına saldyrdy, dep habarlaıdy oblystyq ákimdiktiń baspasóz qyzmeti.
Sońǵy táýlikte Túrkistan oblysynda 12 adamda COVID-19 indeti anyqtaldy. Táýliktik ósim 0,26 % quraıdy. Jalpy oblysta pandemııa beleń alaǵaly 600 myńǵa jýyq PTR- synamalary alynǵan. Al, sońǵy táýlikte zerthanalarda 2276 adam tekserilgen. Juqpaly aýrýlar aýrýhanasynda barlyǵy 610 oryn bar, olardyń 392-si bos.
Aımaqta búginde jalpy 23 myńnan asa medıtsına qyzmetkeri bar. Onyń 5000-nan astamy dárigerler, qalǵandary orta býyn mamandary. Aq halatty jandardyń eren eńbeginiń arqasynda óńirde qaýipti indetti juqtyrǵan 4392 naýqas tolyq jazylyp shyqty. Jalpy, pandemııa bastalǵaly Covid-19 ınfektsııasy rastalǵan 4569 jaǵdaı tirkeldi. Olardyń 2920-da aýrý sımptomsyz ótken bolatyn.
Sonymen qatar, Túrkistan oblysyna qarasty vaktsına saqtaıtyn qoımasyna kólemi 601 lıtr quraıtyn 2 muzdatqysh jetkizildi. Al oblystyq bıýdjet esebinen kólemi 143 lıtr quraıtyn 20 muzdatqysh alynǵan. Vaktsınatsııa júrgizýge arnalǵan 65 pýnkter tolyq tońazytqyshpen jabdyqtalǵan. Budan bólek, vaktsınany tasymaldaıtyn kólemi 50 lıtr quraıtyn 38 termokonteıner tolyq qamtamasyz etilgen.
Aıta keteıik, «Halyq densaýlyǵy jáne densaýlyq saqtaý júıesi týraly» kodekstiń 77-babyna sáıkes, kez kelgen medıtsınalyq em-shara, onyń ishinde vaktsına salý tek adamnyń kelisimimen ǵana júzege asady. Vaktsınadan bas tartqandar ákimshilik ne qylmystyq jaýapkershilikke tartylmaıdy. Densaýlyq saqtaý mınıstrliginiń málimetinshe, ekpe egerdiń aldynda siz arnaıy paraqqa qol qoıý arqyly vaktsınadan bas tartyp nemese saldyrýǵa kelisim beresiz.
