COVID-19: Shymkentte naýqastarǵa jańa gospıtal salyna bastady

ShYMKENT. QazAqparat – Shymkentte COVID-19 vırýsyn juqtyrǵandardy jatqyzý úshin arnaıy gospıtal salyna bastady. Búgin qala ákimi Murat Áıtenov 200 oryndyq aýrýhananyń qurylysymen tanysty, dep habarlaıdy QazAqparat tilshisi.

Qalalyq tótenshe jaǵdaı shtabynyń málimetinshe, tótenshe jaǵdaı kezinde naýqastardy qabyldaıtyn gospıtal tez qurastyrylatyn materıaldardan turǵyzylady. Oǵan qajetti qurylys zattary tolyqtaı otandyq bolmaq. 400-ge jýyq jumysshy jergilikti jerden tartylǵan. Shahar basshysy karantın kezinde jumysshylardy arnaıy avtobýspen tasymaldaý, qaýipsizdik sharalaryn saqtaý jáne aýyr júk kólikteriniń táýlik boıy qurylys zattaryn toqtaýsyz jetkizý máselesinde kedergi bolmaýyn júktedi. Arnaıy aýrýhana statsıonar, jansaqtaý bólimi syndy birneshe bólikten turady. Úılerine barmaı jumys isteıtin medıtsına qyzmetkerleri úshin oryndar jasalady.

«Bul rette ýaqytsha aýrýhananyń jabdyqtalýy men sanıtarlyq-epıdemıologııalyq jaǵdaıy belgilengen normatıvterge tolyq saı bolady. Mundaǵy búkil uıymdastyrý jumystaryn Shymkent qalalyq juqpaly aýrýlar aýrýhanasy úılestiretin bolady. Atalǵan gospıtaldiń qala aýmaǵynda qyzmet etýi ınfektsııalyq aýrýlardyń aldyn alýdy jaqsartatyn bolady», - delingen ákimdik habarlamasynda.