COVID-19 saldarynan semizdikke shaldyqqan balalar sany artqan - DDSU
ASTANA. KAZINFORM – COVID-19 pandemııasy artyq salmaq pen semizdikke shaldyqqan mektep jasyndaǵy balalar sanynyń artýyna ákeldi. Bul týraly Dúnıejúzilik densaýlyq saqtaý uıymynyń (DDSU) Eýropalyq aımaqtyq bıýrosynyń jańa baıandamasynda aıtylǵan, dep habarlaıdy BUU jańalyqtary saıty.
Mektep jasyndaǵy balalardyń minez-qulqy men kúndelikti tártibin zertteý 2021 jáne 2023 jyldar aralyǵynda DDSU Eýropalyq aımaǵyna múshe 53 memlekettiń 17-de júrgizildi. Oǵan 50 myńnan astam bala qatysty.
Baıandama 7-9 jas aralyǵyndaǵy artyq salmaǵy bar balalar sanynyń artqanyn rastaıdy. Bul pandemııa kezinde balalardyń kompıýter ekrandary men basqa qurylǵylardyń aldynda kóp ýaqyt ótkizip, fızıkalyq belsendiliktiń az bolýymen baılanysty, dep habarlaıdy uıym sarapshylary.
Sonymen qatar, zertteýge sáıkes, saýalnamaǵa qatysqan balalardyń 42%-y ózin burynǵyǵa qaraǵanda baqytsyz sezingen. Árbir besinshi bala muńaıyp júretinin aıtqan, al árbir tórtinshisi jalǵyzsyrap júrgenin júrgenin aıtqan.
DDSU pandemııa balalardaǵy semizdikpen kúresýdiń shuǵyl qajettiligin atap ótti: aımaqtaǵy elder damýdyń barlyq kezeńderinde balalardyń durys tamaqtanýy men fızıkalyq belsendiligine basymdyq berýi tıis. Buǵan qol jetkizý úshin uıym densaýlyqqa zııandy ónimderdi jarnamalaýǵa jáne olarǵa salynatyn salyqtarǵa shekteý qoıý, taǵamdy naqty tańbalaý jáne dıetany jaqsartý, mektepterde dene belsendiligin yntalandyrý sharalaryn usyndy.
