COVID-19: «Rahat» fabrıkasy 24 maýsymǵa deıin jumysyn toqtatty
ALMATY. QazAqparat – Almatyda «Rahat» kondıterlik fabrıkasy qyzmetkerleriniń arasynda COVID-19 anyqtalýyna baılanysty fabrıka 24 maýsymǵa deıin óz erkimen qyzmetin toqtatty, dep habarlaıdy QazAqparat tilshisi.
Almaty qalalyq Taýarlar men qyzmetterdiń sapasy men qaýipsizdigin baqylaý departamentiniń málimetteri boıynsha, 3 maýsymnan beri qalada COVID -19 juqtyrý deńgeıi artqan. Osyǵan baılanysty koronavırýs ınfektsııasynyń taralýyn tejeý jáne sanıtarlyq-epıdemıologııalyq jaǵdaıdy turaqtandyrý boıynsha jan-jaqty sharalar qabyldanyp jatyr.
«Maýsym aıynda azamattardyń ózderiniń júginýi jáne uıymdar arasynda oshaqtardyń paıda bolýy esebinen aýrý deńgeıiniń óskeni baıqalady. SES talaptaryn buzýyna baılanysty Kók bazar da «Rahat» kondıterlik fabrıkasy sııaqty jabylyp, aıyppul salyndy. Bizdiń qazirgi mindetimiz - uıymdardyń ózderi búgingi tańda azamattardyń densaýlyǵy qymbat ekenin túsinýileri úshin sharalar qabyldaý», - dedi Almaty qalasy boıynsha Taýarlar men qyzmetterdiń sapasy men qaýipsizdigin baqylaý departamentiniń basshysy – Almaty qalasynyń bas memlekettik sanıtar dárigeri Jandarbek Bekshın.
«Rahat» fabrıkasynda 30 mamyr men 4 maýsym aralyǵynda 10 adamnan KVI anyqtalǵan. Birinshi, fabrıkanyń bir qyzmetkeri josparly operatsııaǵa túsken kezde odan vırýs tabylǵan. Keıin zaýytqa kireberiste turǵan teplovızor arqyly taǵy 8 adamnyń qyzýy joǵary ekeni anyqtaldy. Olardyń barlyǵynda koronavırýs anyqtaldy.
Fabrıkanyń 1500-ge jýyq qyzmetkeri tekserilgen. Olardyń ishinde 467 adamnan vırýs tabyldy. Olarda sımptom belgileri bolmaǵan. Olardyń barlyǵy úı karantınine jiberildi.
Sonymen qatar, Almatyda sanıtarlyq talaptardy saqtamaǵany úshin Kók bazarǵa 620 AEK kóleminde aıyppul salynǵanyn keshe habarlaǵan bolatynbyz.
«Almaty qalasynyń mamandandyrylǵan aýdanaralyq ákimshilik sotynyń sheshimine sáıkes, «Kompanııa «Dostar-Kommerts» JShS (Kók bazar) 620 AEK (1 722 360 tg) kóleminde aıyppul salynyp, qyzmeti 1 aıǵa toqtatyldy», - dedi departament basshysy.
Eske sala keteıik, 21 mamyrda tekserý kezinde Kók bazar aýmaǵynda kóp ereje buzýshylyqtar anyqtalǵan edi. Kelýshilerd áleýmettik qashyqtyq saqtamaǵan. Bazar basshylyǵynyń eskertpelerdi elemegeni 12 maýsymda júrgizilgen tekserý kezinde anyqtaldy.
