Covid-19: Pavlodar oblysynda 12 aýdan «qyzyl» aımaqta
PAVLODAR. QazAqparat - Pavlodarda Covid-19-ǵa qarsy jedel shtabtyń otyrysy ótti, dep habarlaıdy Pavlodarnews.kz.
Oblystyq sanıtarlyq-epıdemıologııalyq baqylaý departamentiniń basshysy Batyrbek Álıev 25 qańtardaǵy jaǵdaı boıynsha óńirde 15 qala men aýdannyń 12-si «qyzyl aımaqta» ekenin atap ótti. Jalǵyz Baıanaýyl aýdany - «sary aımaqta». Sondaı-aq oblystaǵy 40 aýyl - «qyzyl aımaqta» tur.
«27 qańtardaǵy jaǵdaı boıynsha oblysta koronavırýstyń rastalǵan 12328 jaǵdaıy anyqtaldy. Sońǵy 2 aptadaǵy jaǵdaıdy alyp qarasaq, 11-17 qańtar arylyǵynda 616 jaǵdaı, 18-24 qańtar aralyǵynda 1339 jaǵdaı tirkelgen. Osy jaǵdaı qazirgi karantındik shekteý sharalaryn saqtaýdy jáne erejelerdi ustanýdy qatań baqylaýdy talap etedi. Ótken táýlikte 219 KVI jaǵdaıy anyqtaldy», - dedi Batyrbek Álıev.
Batyrbek Álıevtiń aıtýynsha, oblysta 2020 jyldyń naýryz-jeltoqsan aılarynda óndiristik kásiporyndarda 803 KVI jaǵdaıy tirkelgen. 1 qańtardan beri 248 jaǵdaı anyqtaldy. «KAZ Minerals Bozshakol» JShS, «Qazhrom» TUQ» AQ jáne «ERG Service» JShS kóp anyqtalǵan.
«Kásiporyndarda 48 jospardan tys tekserý júrgizildi. Anyqtalǵan ereje buzýshylyqtarǵa baılanysty jalpy somasy 5 mıllıon 500 myń teńgege 14 ákimshilik aıyppul taǵaıyndaldy», - dedi departament basshysy.
Oblys ákimi Ábilqaıyr Sqaqov qalalar men aýdandardyń jáne kásiporyndardyń basshylyǵyna shekteý sharalaryn kúsheıtýdi jáne olardyń saqtalýyn baqylaýdy tapsyrdy.
«Aptalyq kórsetkishterge qaraǵanda Ekibastuz, Aqsý qalalarynda jáne Ertis, Jelezın, Maı aýdandarynda ósý baıqalady. Al, Sharbaqty, Ýspen, Pavlodar aýdandarynda tómendeý bar. Іshki jaǵdaımen qatar, memlekettik shekaraǵa jaqyn aýdandarda qozǵalysty baqylaý qajet. Jol boıyndaǵy qyzmet kórsetý oryndarynda talaptardy saqtap, dezınfektsııalyq jumystardyń turaqty júrgizilýin qadaǵalaý kerek. Ekibastuz qalasynyń jaǵdaıdy turaqtyndyrý boıynsha tájirıbesi bar. Qazir de sol tájirıbeni qoldaný qajet», - dedi oblys ákimi.
Aıta keteıik, osy ýaqytqa deıin Pavlodar oblysynda 12328 adam KVI juqtyrǵan. 10793 adam indetten jazylyp shyqty. 99 adam kóz jumdy.
Eske salsaq, 28 qańtardaǵy epıdemıologııalyq ahýaldy baǵalaý matrıtsasy boıynsha Qazaqstannyń 6 oblysy men 2 qalasy áli de «qyzyl» aımaqta tur. Olar: Aqmola, Pavlodar, Atyraý, Qostanaı, Soltústik Qazaqstan, Batys Qazaqstan oblystary men Nur-Sultan jáne Almaty qalalary.