COVID-19 pandemııasynan júzdegen myń baladan aıyrylyp qalýymyz múmkin – BUU

NЬıÝ-IORK. QazAqparat – Zertteý málimetteri boıynsha, jańa koronavırýs balalarǵa qaraǵanda eresekter úshin qaýipti. Alaıda, daǵdarys óskeleń urpaqtyń ál-aýqatyna aıtarlyqtaı áser etti. Al áleýmettik-ekonomıkalyq saldar áli de uzaq ýaqyt seziletin bolady. BUU sarapshylarynyń baǵalaýynsha, bıyl júzdegen myń bala qaıtys bolýy yqtımal. Olar pandemııa bolmaǵanda, aman qalýy múmkin edi. Bul týraly BUU-nyń jańa baıandamasynda jazylǵan, dep habarlaıdy QazAqparat «BUU jańalyqtaryna» silteme jasap.

«Bıyl 42-66 mıllıon bala kedeıliktiń zardabyn shegýi múmkin. 188 eldegi 1,5 mıllıard kámeletke tolmaǵandar men jastar ókilderi bilim berý mekemelerine barmaıdy. Memleketterdiń úshten ekisi qashyqtan oqytýdy engizdi, biraq barlyq elde mundaı múmkindik joq. Sarapshylar májbúrli demalys balalardyń damýyna qalaı áser etetinin baǵalaýdy áli qolǵa alǵan joq.

Balalardyń qaıtys bolý jaǵdaılarynyń sany sońǵy úsh jyldaǵy balalar ólim-jitimine qarsy kúrestegi jetistikterdi joqqa shyǵara otyryp, júzdegen myń adamǵa artady. Bul esepteýlerde qaıta júktelgen densaýlyq saqtaý júıesi aıasynda týyndaǵan medıtsınalyq qyzmet kórsetý problemalary eskerilmegen – bul jeke másele. Ázirshe másele basqa faktorlarda bolyp otyr: mysaly, 143 eldegi 368,5 mıllıon bala tańǵy asyn mektepte alady, qazir olardyń kópshiligi qajetti tamaqpen qamtamasyz etilmeı otyr», -delingen baıandamada.

Budan bólek, atap ótilgendeı, balalar oqshaýlaý rejımine shydamaıdy, bul olardyń psıhıkalyq densaýlyǵyna keri áser etedi. Ásirese, oqshaýlaý ortalyqtarynda otyrǵan bosqyndar men mıgranttardyń balalary osal bolyp keledi.

«Baıandama avtorlarynyń qorytyndysy kúmán týǵyzbaıdy. Balalardy osy qaýipterden qorǵaý úshin biz dál qazir áreket etýimiz kerek», - dedi BUU Bas hatshysy Antonıý Gýterrısh qujatty usyna otyryp.

BUU sarapshylary halyqqa bilim alýǵa umtylýǵa, ata-analarǵa úıde eriksiz otyrý jaǵdaıynda balalarmen qarym-qatynas jasaý daǵdylaryn úıretýdi usynady.

Baıandamada aıtylǵandaı, karantın rejımin kezeń-kezeńimen alyp tastaý kezinde, eń aldymen, balalarǵa qyzmet kórsetetin mekemelerdiń jumysyn qalpyna keltirý qajet.