COVID-19 pandemııasy kezinde qandaı áleýmettik qoldaý kórsetildi – Eńbek mınıstri

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Serik Shápkenov COVID-19 pandemııasy kezeńinde halyqqa qandaı áleýmettik qoldaý kórsetilgenin aıtyp berdi, dep habarlaıdy QazAqparat tilshisi.

«2020 jyly tótenshe jaǵdaı rejımi men karantın engizilgen kezde halyqty qoldaýdyń qosymsha sharalary kórsetildi. Memleket áleýmettik saqtandyrý qorynan alǵash ret áleýmettik tólemder engizdi. Eń aldymen qyzmetin shekteýge baılanysty tabysynan aıyrylǵan azamattar úshin – eń tómengi jalaqy mólsherinde tólemder engizildi. TJ jáne karantın kezeńinde olardy 476 mlrd teńge somasyna 4,6 mln adam aldy», - dedi mınıstr halyqqa esep berý kezdesýinde.

Sonymen birge, jumysta COVID-19 juqtyrǵan dárigerlerge jáne medıtsına qyzmetkerleri qaıtys bolǵan jaǵdaıda olardyń otbasylaryna tólemder qarastyrylǵan jáne 9,5 myń adam 20,5 mlrd teńge alǵan.

«Budan basqa, aı saıyn áleýmettik jaǵynan osal sanattardaǵy 1 mln-nan astam azamat jalpy somasy 25 mlrd teńgege azyq-túlik jıyntyǵy túrinde qoldaý aldy. Infektsııanyń kóbeıý qaýpin azaıtý úshin 600 myńnan astam adamǵa ataýly áleýmettik kómek taǵaıyndaldy. Múgedektikti belgileý jáne múgedektigi bar 55,5 myń adamǵa járdemaqy tóleý merzimderi avtomatty túrde uzartyldy», - dedi S. Shápkenov.